Сарраёсати Хадамоти назорати давлатии тандурустӣ ва ҳифзи иҷтимоии аҳолӣ дар вилояти Суғд дар нуҳ моҳи сипаришудаи  соли равон дар 32 муассисаи фармасевтӣ, 65 муассисаи табобатию профилактикии давлатӣ ва  ғайридавлатии вилоят санҷишҳои нақшавӣ ва ғайринақшавиро анҷом дод.

 

Бино ба гузориши директори сарраёсати Хадамоти мазкур Илҳомҷон Пӯлодзода дар нуҳ моҳи соли равон нисбати ҳуқуқвайронкунандагон дар муассисаҳои фармасевтӣ, табобатию профилактикии давлатӣ ва ғайридавлатӣ ва мағозаҳои зери санҷиш қароргирифта, ба маблағи 252 ҳазору 216  сомонӣ ҷарима ба фоидаи буҷети давлат ситонда шуд.

Ба 65 муассисаи фармасевтӣ, табобатию профилактикии давлатӣ ва ғайридавлатӣ амрномаҳо ҷиҳати бартараф намудани камбудиҳо ирсол гашта, дар ин фосилаи вақт, аллакай, оид ба бартараф сохтани камбудиҳо ҷавоб ворид шуд.

Вақтҳои охир дар ҷомеа сару садоҳо оид ба ворид гардидани номгӯи доруҳои сифатан паст ва муҳлаташон гузашта баланд мешаванд, ки беваҷҳ нест. Ҷиҳати баррасии саривақтии ин масъала аз тарафи мутахассисони шуъбаҳои  сарраёсати Хадамоти назорати давлатии тандурустӣ ва ҳифзи иҷтимоии аҳолӣ дар вилояти Суғд маъракаи несту нобудсозии маводҳои доруворӣ, молҳои тиббӣ, маводҳои ороишию гигиении муҳлати истифодабариашон гузашта, бе сертификати мутобиқат ва ба талаботи стандартӣ ҷавобгӯй набуда, дар партовгоҳи ноҳияи Бобоҷон Ғафуров бо таври сӯзондан гузаронда шуд. Дар натиҷа, як ҳазору 146 номгӯй маводи доруворӣ  бо вазни 19 ҳазору 192,8 килограмм, ки  маблағи  умумиаш 225 ҳазору 687 сомониро ташкил медиҳад, ба коми оташ рафт. 

Инчунин, нисбат ба 11 нафар корманди тиб  муҷозоти интизомӣ ва аз тарафи роҳбарони муассисаҳо нисбати 72 корманд сарзаниш татбиқ карда шудааст.

 

Ҷовиди АШТӢ, “Ҷумҳурият”