Мувофиқи ҳисоботи Сарраёсати молияи вилояти Хатлон, то 1 октябри соли 2022 хароҷоти маблағҳои буҷетӣ барои хариди маводи гармидиҳӣ (ангишт, ҳезум, сӯзишвории дизелӣ) ба соҳаҳои ҳаётан муҳим: маориф ва тандурустӣ дар 25 шаҳру навоҳии вилоят аз 100 то 159 дарсад иҷро шудааст. Пешоҳангон ноҳияи Кӯшониён (маблағгузорӣ дар соҳаи маориф: 159%, тандурустӣ: 123%), шаҳри Бохтар (маориф: 125%, тандурустӣ: 100% ва ноҳияи Қубодиён (маориф: 132%, тандурустӣ: 133%) ба шумор мераванд. Ҳаҷми маблағгузорӣ низ аз буҷетҳои маҳаллӣ нисбат ба солҳои қаблӣ бамаротиб афзоиш ёфта, он дар маҷмуъ, дар соҳаи маориф ба 10746068 сомонӣ ва дар соҳаи тандурустӣ ба 1412818 сомонӣ баробар шудааст.

 

– Тибқи қарори раиси вилояти Хатлон Қурбон Ҳакимзода, аз апрели соли 2022, № 138 “Оид ба рафти иҷрои қарори Ҳукумати Ҷумҳурии Тоҷикистон аз марти соли 2022, № 133 “Дар бораи сари вақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2022-2023”, – гуфт зимни суҳбат ба мо сардори Сарраёсати молияи вилоят Ҳабибулло Иззатуллозода, – барои хариди маводи гармидиҳӣ, аз ҷумла 11 ҳазору 812 тонна ангишт, 24 ҳазору 397 метри мураббаъ ҳезум, 60 ҳазору 886 литр сӯзишвории дизелӣ аз ҳисоби буҷетҳои маҳаллии шаҳру навоҳӣ дар соли 2022 ба соҳаи маориф 10,4 миллион сомонӣ маблағ пешбинӣ шудааст. Бо ин маблағ дар маҷмуъ, 653 тонна ангишт, 2 ҳазору 480 метри мураббаъ ҳезум ва 32 ҳазору 600 литр сӯзишвории дизелӣ таъмин шуд, ин тадбир дар кулли шаҳру навоҳии вилояти Хатлон дар арафаи анҷомёбист. Бо мақсади иҷрои чорабиниҳо ва дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои омода шудан ва таъмин кардани маводи гармидиҳӣ ба муассисаҳои таҳсилоти миёнаи умумӣ ва бунгоҳҳои тиббӣ, марказҳои саломатӣ, беморхонаҳо маблағи нақшавӣ пурра равона гардид.

 

Зокир ҲАСАН, “Ҷумҳурият”