Дар Бонки миллии Тоҷикистон мизи гирд баргузор гардид, ки дар он роҳу воситаҳои дарёфти кумакҳои машваратию молиявӣ ҷиҳати амалисозии Нақшаи чорабиниҳои Стратегияи миллии фарогирии молиявии Ҷумҳурии Тоҷикистон барои солҳои 2022-2026 мавриди баррасии иштирокдорон қарор гирифт. 

 

Дар нишаст муовини якуми раиси Бонки миллии Тоҷикистон Фирдавс Толибзода, муовини раис Гулбаҳор Назирӣ ва намояндагони шарикони рушд, аз қабили Корпоратсияи байналмилалии молиявӣ, Дафтари Швейтсария оид ба ҳамкориҳои иқтисодӣ дар Ҷумҳурии Тоҷикистон, Бонки осиёии рушд, Фонди хазинаи амонатӣ ва муносибатҳои байналмилалии Олмон дар Ҷумҳурии Тоҷикистон, Бонки рушди Авруосиё, дигар ташкилотҳои байналмилалии молиявӣ ва роҳбарони воҳидҳои сохтории калидии БМТ ширкат варзиданд.

Фирдавс Толибзода барои ҳамкориҳои мутақобилан судманд ба шарикони рушд изҳори миннатдорӣ намуда, саҳми онҳоро дар таъмини рушди устувори соҳаҳои иқтисоди миллӣ ҳамчун шарикони боэътимод арзёбӣ кард. Зикр шуд, ки Стратегия таҳти роҳбарии Бонки миллии Тоҷикистон ва иштироки намояндагони вазорату идораҳои дахлдор, мушовирони хориҷӣ таҳия гардида, бо қарори Ҳукумати Ҷумҳурии Тоҷикистон аз 1 июли соли 2022, №314 тасдиқ шуда, 20 – 21 сентябри соли равон маросими оғози расмии татбиқи он доир гардид.

“Стратегияи мазкур бо назардошти таҳлили вазъи воқеӣ, ризоияти тарафҳои манфиатдор ва ба инобат гирифтани хусусиятҳои хоси кишвар қабул шуда, доираи васеи хизматрасониҳои баландсифати расмии молиявиро фаро мегирад ва дар баробари таъмини ҳимояи ҳуқуқи истеъмолкунандагони хизматрасониҳои молиявӣ, инчунин, барои ҷорӣ намудани усулҳои нави рушд дар самти таҳкими воситаҳои электронии пардохти ватанӣ мусоидат мекунад. Бинобар ин, барои таъмини иҷрои саривақтӣ ва самараноки чораҳои пешбининамудаи Стратегия кумакҳои машваратию молиявии шарикони рушд нақши муҳим доранд”, – таъкид намуд Фирдавс Толибзода.

Дар ҷараёни нишаст таъкид гашт, ки Нақшаи чорабиниҳои Стратегия 67 бандро дар бар гирифта, 11 банди он ба анҷом расид ва 28 чорабинӣ бо дастгирии молиявию машваратии шарикони рушд дар раванди иҷро қарор дорад. Қисми дигари чорабиниҳо гузарондани таҳқиқоту таҳлилҳои махсусро талаб менамояд.  

Намояндагони шарикони рушди ташкилотҳои байналмилалии молиявӣ, зимни баррасии масъалаҳои рӯзнома муҳим будани чунин як чорабиниро иброз дошта, омодагии худро барои саҳмгузор будан дар раванди татбиқи Стратегия зикр карда, аз дигар ташкилотҳои байналмилалии молиявӣ даъват намуданд, ки дар иҷрои он саҳм бигиранд. 

Як нукта боиси тазаккур аст, ки дар рафти мизи мудаввар ҷиҳати татбиқи Нақшаи амалисозии стратегия мутахассисони Бонки миллии Тоҷикистон якчанд пешниҳодҳои мушаххас, аз қабили таъсиси Маркази ягонаи байнибонкии мушаххаскунӣ, пайвасткунандаи миллӣ (National switch) барои пардохтҳои кортӣ, татбиқи низоми пардохтҳои босуръат (IFT)-ро ба ҳозирин манзур намуданд, ки барои рушди инфрасохтори бозори молиявӣ, беҳтар намудани дастрасии аҳолӣ ба хизматрасониҳои муосири молиявӣ ва зиёд шудани ҳиссаи пардохтҳои ғайринақдӣ мусоидат хоҳад кард. 

Фирдавс Толибзода изҳори боварӣ намуд, ки шарикони рушд ба татбиқи босамари Нақшаи чорабиниҳои амалисозии Стратегияи миллии фарогирии молиявии Ҷумҳурии Тоҷикистон барои солҳои 2022-2026 таваҷҷуҳи хос зоҳир намуда, саҳми назарраси худро хоҳанд гузошт. Маҳз ба туфайли ҳамоҳангию ҳамкории судманду дуҷониба ва кумаку дастгирии машваратию молиявии шарикони рушд татбиқи самаранок ва саривақтии Стратегияи мазкур имконпазир мегардад. 

 

Муҳаммадзоиршо ШАРИФЗОДА,

“Ҷумҳурият”