RT.  Вазири корҳои хориҷии Туркия Мавлуд Чавушоғлу дар мусоҳиба бо шабакаи телевизионии “Tvnet” гуфт, ки Озарбойҷон ва Арманистон дар бораи нуктаҳои бунёдии созишномаи сулҳ ба мувофиқа  расиданд. Аз рӯи нуктаҳои асосӣ, ки панҷто буданд, созиш ҳосил шуд.

Ин эътирофи тамомияти арзии ҳамдигар, аломатгузории сарҳадҳо ва ғайраро дар бар мегирад. Фақат иҷрои онҳо боқӣ мемонад. Ӯ, ҳамчунин, афзуд, ки раванди ба эътидол овардани равобити Анкараву Ереван ва музокироти Бокуву Ереван дар бораи тавофуқномаи сулҳ наметавонад аз ҳамдигар ҷудо шавад.

 

 

Бори аввал дар таърихи Қазоқистон якбора ду зан ба мақоми президентӣ довталаб мешавад

Мир 24. Пешбарии номзадҳо ба мақоми президентӣ дар Қазоқистон ба поён расид. Барои ширкат дар сабқати интихоботӣ даҳ нафар муроҷиат кардаанд. То ҳол танҳо нисфи онҳо расман дар КМИ сабти ном шудаанд. Бори аввал дар таърихи ин кишвар ду зан  ба мақоми  президентӣ довталаб мешавад. 

Инҳо Каракат Абден, модари чор фарзанд, ки  аз сабти ном дар КМИ бомуваффақият гузашт ва  Салтанат Турсинбекова мебошанд. Салтанат Турсинбековаро Иттиҳодияи ҷамъиятии модарони қазоқ ба унвони номзад ба мақоми президентӣ пешбарӣ кардааст.

Комиссияи марказии интихобот то кунун панҷ номзадро сабти ном намудааст.

 

 

Амири Қатар бо сафари давлатӣ вориди Қазоқистон гардид

 

CentralAsia (KZ). Амири Қатар Шайх Тамим бин Ҳамад оли Сонӣ бо  сафари давлатӣ вориди Қазоқистон шуд.  Дар фурудгоҳи пойтахт меҳмони олиқадрро Президенти Қазоқистон Қосим-Жомарт Токаев пешвоз гирифт.

Дар ҷараёни ин сафар имрӯз баргузории музокироти дуҷониба дар сатҳи олӣ ва имзои як қатор санадҳои муҳим дар назар аст.

Шайх Тамим бин Ҳамад оли Сонӣ 13 октябр дар нишасти VI Машварати ҳамкорӣ ва тадбирҳои боварӣ дар Осиё иштирок мекунад.

 

 

Иштироки Путин ва Зеленский дар нишасти G20 тасдиқ шуд

 

Lenta.ru. Вазири корҳои хориҷии Индонезия Ретно Марсуди расман тасдиқ кард, ки Президенти Россия Владимир Путин ва Президенти Украина Владимир Зеленский дар нишасти G20 дар Бали ширкат хоҳанд кард. 

Ӯ, ҳамчунин, таъкид кард, ки "вазъи кунунии ҷаҳон ноустувор аст", аммо идораи вай саъй дорад бо сарварони ду давлат тамос барқарор намояд. Ҳамоиш 15-16 ноябр дар Бали баргузор мешавад. Қаблан Путин ва Зеленский барои ширкат дар нишасти G20 розӣ шуда буданд. Мулоқоти эҳтимолӣ дар нишасти G20 нахустин мулоқоти рӯбарӯи сарварони Россия ва Украина аз замони оғози амалиёти махсуси низомии рӯзи 24 феврал хоҳад буд.