13 октябр Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Остона дар Ҳамоиши шашуми Машварати ҳамкорӣ ва тадбирҳои боварӣ дар Осиё, ки таҳти раёсати Ҷумҳурии Қазоқистон баргузор гардид, иштирок карданд.

 

Дар Ҳамоиши сатҳи баланди байналмилалӣ сарварони давлатҳо, ҳукуматҳо ва намояндагони воломақоми кишварҳои аъзо, роҳбарону намояндагони давлатҳои нозир, ташкилоту созмонҳои байналмилалии нозир ва шарик ширкат варзиданд.

Президенти Ҷумҳурии Тоҷикистон муҳтарам Эмомалӣ Раҳмон дар  Ҳамоиши мазкур сухан ронда, нахуст ба Президенти Ҷумҳурии Қазоқистон муҳтарам Қосим-Жомарт Токаев барои дар сатҳи баланди  тадорукотӣ баргузор кардани мулоқоти навбатии сарварони давлатҳо ва ҳукуматҳо ва пазироии самимӣ изҳори сипос намуданд.

Президенти мамлакат муҳтарам Эмомалӣ Раҳмон зимни суханронӣ оид ба таҳаввулоти амиқ дар арсаи ҷаҳон, оқибатҳои пандемияи COVID-19, таъсири он ба иқтисод ва амнияти кишварҳо, буҳрони иқтисодию иҷтимоӣ ва вазъи амнияти байналмилалию минтақавӣ, афзоиши терроризм, ифротгароӣ, ҷиноятҳои муташаккили фаромиллӣ, қочоқи маводи мухаддир ва ҷиноятҳои киберӣ андеша ронда, талошҳои муштарак дар мубориза бо ин чолишҳо ва таҳдидҳо, инчунин, ҳамоҳангсозии корҳоро ҷиҳати таҳкими сулҳу субот ва амният зарур шумурданд.

Таъкид гардид, ки Тоҷикистон иштирокчии фаъоли муколамаи глобалии амният дар доираи созмонҳои байналмилалӣ ва минтақавӣ мебошад. Кишвари мо дар асоси таҷрибаи андӯхтаи худ дар самти мубориза бо хатару таҳдидҳои ҷаҳонӣ Стратегияи нави мубориза бо терроризм ва ифротгароиро барои давраи то соли 2025 таҳия ва қабул намуд.

Бо ёдоварӣ аз ташаббусҳои ҷаҳонии Тоҷикистон дар мубориза бо таҳдиду хатарҳои ҷаҳони муосир Сарвари давлат таъкид доштанд, ки чанд рӯз пас дар пойтахти Тоҷикистон дар якҷоягӣ бо Созмони Милали Муттаҳид ва дигар шарикони байналмилалӣ Конфронси сатҳи баланд дар чаҳорчӯби “Раванди Душанбе” оид ба мубориза бо терроризм доир мегардад, ки мавзуъҳои муҳими ҷаҳонро дар бар мегирад.

Мавриди зикр аст, ки пас аз шомил шудан ба Машварати ҳамкорӣ ва тадбирҳои боварӣ дар Осиё Тоҷикистон барои ноил гаштан ба ҳадафҳо дар доираи Машварат саҳми арзанда мегузорад.

Президенти мамлакат муҳтарам Эмомалӣ Раҳмон дар заминаи вазифаҳои умумии Декларатсияи дар ҳамоиши Душанбе қабулшуда, андешаҳои худро доир ба рушди сайёҳӣ, ҳалли масъалаҳои муҳими амнияту ҳамкорӣ дар Осиё, аз ҷумла вазъи Афғонистон, баён намуда, таваҷҷуҳи роҳбарони давлатҳои аъзои Машваратро ба ҳалли саривақтии мушкилоти мавҷуда ва ҳамоҳангсозии минбаъдаи кӯшишҳо ҷалб сохтанд.

Сарвари давлат муҳтарам Эмомалӣ Раҳмон аз ташаббусҳои ҷаҳонии Тоҷикистон дар самти ҳалли мушкилоти глобалии норасоии оби ошомиданӣ ва тағйирёбии иқлим ёдовар шуда, сарварони кишварҳо ва ташкилоту созмонҳои байналмилалиро ба мустаҳкам намудани ҳамкорӣ дар соҳаи муқовимат ба пайомадҳои тағйирёбии иқлим даъват карданд.

Бояд гуфт, ки ҷониби Тоҷикистон бо мақсади ҷалби таваҷҷуҳи бештари ҷомеаи ҷаҳонӣ ба ҳалли мушкилоти обу иқлим ва обшавии пиряхҳо қаблан пешниҳод карда буд, ки соли 2025 - Соли байналмилалии ҳифзи пиряхҳо эълон шавад.

Президенти мамлакат изҳори умед карданд, ки талошҳои Тоҷикистон дар ин самт аз ҷониби кишварҳои аъзои Машварати ҳамкорӣ ва тадбирҳои боварӣ дар Осиё ҳамаҷониба дастгирӣ хоҳанд ёфт.

Соли 2023 аз нигоҳи баррасии миёнамуҳлати Ҳадафҳои Рушди Устувор ва арзёбии иҷрои ҳадафҳои Даҳсолаи байналмилалии  амал  “Об барои рушди устувор”, солҳои 2018 - 2028 соли муҳим мебошад. Ҷомеаи ҷаҳонӣ аз Конфронси дуюми Созмони Милали Муттаҳид, ки соли оянда дар Ню-Йорк баргузор мешавад, натиҷаҳои назаррасро интизор аст. Тоҷикистон яке аз ҳамраисҳои ин Ҳамоиши муҳими байналмилалӣ хоҳад буд.

Изҳори итминон шуд, ки дурнамои фаъолияти муштараки мамлакатҳо дар самти таҳкими эътимоду амният, инчунин, ҳамкории васеи бисёрҷониба дар ҳалли масъалаҳои мубрам, муайян карда шавад.