13 октябр Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҳошияи ҳамоиши Машварати ҳамкорӣ ва тадбирҳои боварӣ дар Осиё дар шаҳри Остона бо вазири энергетика ва зерсохтори Амороти Муттаҳидаи Араб Суҳайл Мазруӣ вохӯрданд.

 

Дар мулоқот масоили ҳамкории ду кишвар мавриди муҳокима қарор дода шуд.

Президенти мамлакат муҳтарам Эмомалӣ Раҳмон дар оғози суҳбат иброз доштанд, ки Амороти Муттаҳидаи Араб дар сиёсати хориҷии Тоҷикистон ҷойгоҳи муҳим дорад ва мо ҷонибдору ҳавасманди тақвият ва густариши ҳамкориҳои гуногунҷанба бо он мебошем.

Ҷонибҳо оид ба масоили рушди муносибатҳои иқтисодию тиҷоратӣ ва сармоягузорӣ табодули андеша карда, аз сатҳи робитаҳои сиёсии ду кишвари бародар ва дӯст, инчунин, ҳамкорӣ дар чорчӯби созмонҳои байналмилалӣ изҳори қаноатмандӣ намуданд.

Мусоҳибон доир ба рушди ҳамкорӣ дар соҳаҳои ояндадори энергетика, ифтитоҳи корхонаҳои муштарак дар бахшҳои саноати кӯҳии Тоҷикистон, коркарди пахта ва маҳсулоти ниҳоӣ, баҳрабардорӣ аз захираҳои бузурги гидроэнергетикӣ, сармоягузории лоиҳаҳои барои ҷонибҳо судовар ва ҳамкории ниҳодҳои молиявию бонкӣ табодули афкор намуданд.

Дар бахши кишоварзӣ таҳкими ҳамкорӣ дар масъалаи ба роҳ мондани содироти маҳсулоти кишоварзӣ аз Тоҷикистон ба Аморот, аз ҷумла меваҳои тару тоза ва хушк, сабзавот, асал ва чорвои зиндаю маҳсулоти гӯштӣ, зарур дониста шуд.

Густариши робитаҳо дар соҳаи сайёҳӣ яке аз самтҳои дигари ояндадори робитаҳои байни Тоҷикистону Аморот маънидод гардид.

Зиёд намудани хатсайрҳои ҳавоӣ ва пайваст намудани пойтахтҳо –  Абу Забӣ ва Душанбе –  тавассути роҳандозии парвозҳои мустақим ба мақсад мувофиқ шумурда шуд.

Ҷонибҳо, ҳамчунин, оид ба дигар масъалаҳои муҳими мавриди таваҷҷуҳ гуфтугӯи судманд анҷом доданд.