Дар ноҳияи Шаҳринав ба ифтихори 30-солагии Иҷлосияи таърихии  XVI Шурои Олии  Ҷумҳурии Тоҷикистон бинои шуъбаи бемориҳои сироятиии беморхонаи марказии ноҳия пас аз  навсозӣ мавриди истифода қарор гирифт. Зимни ифтитоҳи он Абдухолиқ  Амирзода, муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон ва Абдуқодир Вализода, раиси ноҳияи Шаҳринав,  ширкат варзиданд.  

Шуъбаи бемориҳои сироятӣ дорои 8 ҳуҷраи муолиҷавӣ, ҳуҷраи табибон, ҳуҷраҳои корӣ ва 20 кати хоб барои беморон мебошад. Ҳамзамон, шуъбаи мазкур бо дастгоҳу таҷҳизоти замонавии кардиоманитор, пирометр, дастгоҳи нафасдиҳии сунъӣ, луобкашак, оксигенератор, ларингоскоп, пулсиоксиметр ва ЭКГ таъмин гардид.

Мавриди зикр аст, ки дар беморхона дастрасӣ ба хатти оксиген мавҷуд набуд, ҳангоми зарурат он аз шаҳри Душанбе ё Турсунзода дастрас карда мешуд. Хушбахтона, дар доираи таҷдиди шуъбаи мазкур дар беморхона стансияи истеҳсоли оксигени тиббӣ насб гардида, хатти таъмини он муҳайё шудааст. 

Зимни шиносоӣ муовини вазири тандурустӣ ва ҳифзи иҷтимоии аҳолии кишвар Абдухолиқ Амирзода иброз намуд: “Бо дастгирии Ҳукумати мамлакат ва таваҷҷуҳи аввалиндараҷаи Пешвои миллат муҳтарам Эмомалӣ Раҳмон ба соҳаи тандурустӣ имрӯз шуъбаи мазкур навсозӣ шуда, тамоми шароитҳои зарурии корӣ муҳайё гардонда шуданд. Масъулонро зарур аст, ки  истифодаи босамари дастгоҳу воситаҳои муосири тиббиро риоя карда, бо беморон муомилаи хуб намоянд”.   

Абдуқодир Вализода, раиси ноҳияи Шаҳринав изҳор дошт: “Боиси ифтихору сарфарозист, ки дар партави сиёсати хирадмандонаи Пешвои муаззами миллат муҳтарам Эмомалӣ Раҳмон ва  бо дастгирии Ҳукумати мамлакат дар тамоми шаҳру навоҳии кишвар бунёду навсозии беморхонаҳо, марказҳои саломатӣ, бунгоҳҳои тиббӣ ва дармонгоҳҳо ба ҳукми анъана даромадааст. Дар доираи татбиқи амалии барномаҳои миллӣ дар соҳаи тандурустии мамлакат, махсусан дар ноҳияи Шаҳринав, комёбиҳо назаррасанд. Ин раванд имкон дод, ки соҳаи тандурустӣ рушд намуда, сатҳу сифати хизматрасонии тиббӣ ба аҳолӣ беҳтар гардад”. 

– Ба шарофати соҳибистиқлолии кишвар соҳаи тандурустӣ низ, зина ба зина рушд намуда, мушкилиҳо бартараф мешаванд. Ин аст, ки  барои муолиҷаи беморони вазнин дар шуъбаҳои эҳёкунанда, таваллудхона, бемориҳои дил, ҷарроҳӣ, бахши ҷарроҳӣ, бемориҳои сироятӣ 60 нуқтаи хатти оксигени тиббӣ насб гардид, – изҳор дошт  Ғайбулло Раҳимзода сартабиби беморхонаи мазкур.

 

Матлубаи АБДУҚАҲҲОР, «Ҷумҳурият»