Дар Боғи фарҳангу фароғатии ба номи Абулқосим Фирдавсии шаҳри Душанбе бо ташаббуси Вазорати кишоварзии Ҷумҳурии Тоҷикистон ва Мақомоти   иҷроияи ҳокимияти давлатии шаҳри Душанбе “Иди Меҳргон, фестивал - намоиши маҳсулот, техникаи кишоварзӣ ва иди асал” бо шукӯҳ таҷлил гардид. Дар он Эмомалӣ Насриддинзода, ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, Сулаймон Зиёзода, муовини Сарвазири мамлакат, Саъдӣ Каримзода, вазири кишоварзӣ, намояндагони Ҳукумати  мамлакат, Мақомоти иҷрояи ҳокимияти давлатии шаҳри Душанбе, Академияи илмҳои кишоварзӣ, Донишгоҳи аграрии Тоҷикистон ба номи Шириншоҳ Шоҳтемур ва сокинону меҳмонони пойтахт, иштирок намуданд.

Ҳадаф аз баргузории чорабинии мазкур тарғиби рушди маҳсулоти кишоварзӣ, муаррифии дастранҷи деҳқон, эҳё намудани анъанаҳои парвариши навъҳои гуногуни меваҷоту сабзавот ва аз таҷрибаи деҳқон баҳра бурдан аст.

Эмомалӣ Насриддинзода, ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, иштирокдорони намоишро бо ин ҷашни миллӣ табрик намуда,  Паёми шодбошии  Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро ба кулли иштирокдорон расонд. Аз ҷумла, зикр кард, ки Меҳргон яке аз ҷашнҳои қадимтарини мардуми мо, иди меҳру муҳаббат, дӯстию рафоқат, накукорӣ, натиҷаи заҳмати барзгарон аст, ки ниёгони мо баъди ҷамъоварии ҳосил онро таҷлил менамуданд. Меҳргон  - иди ҳосилот,  мероси арзишманди аҷдоди шарафмандамон, яке аз рукнҳои муҳими худшиносиву худогоҳии мардуми мо мебошад ва дар фарҳангу тамаддуни халқи тоҷик ҷойгоҳи хосса дорад. Гузаштагони мо анъанаву суннатҳои онро дар хотираи таърихии хеш чун дурри гаронбаҳои маънавӣ ҳифз карда, то ба наслҳои имрӯза расондаанд. Мояи  ифтихор аст, ки ба шарофати соҳибистиқлолии мамлакат ва сиёсати хирадмандонаи Пешвои муаззами миллат муҳтарам Эмомалӣ Раҳмон анъанаву суннатҳо ва ҷашнҳои миллии мардуми куҳанбунёди мо эҳё гардида, арҷгузорӣ ба онҳо сол ба сол бештар мешавад. Меҳргон ҷашни кишоварзон мебошад. Дар робита ба ин,  хотирнишон бояд кард, ки бо сабаби вазъи ноороми сайёра, тағйирёбии иқлим ва оқибатҳои ногувори он, таҳлилҳои иқтисодиву молиявӣ ва дигар омилҳои мамлакатҳои ҷаҳон болоравии босуръату бесобиқаи нархи маводи ғизоӣ ва маҳсулоти кишоварзӣ мушоҳида мегардад. Бо назардошти ин, дар чунин шароит мо бояд бештар кор кунем, заҳмат кашем ва ҳарчи бештар маҳсулоти ғизоӣ истеҳсол ва захира намоем, зеро ин вазифаи аввалиндараҷаи мо дар вазъияти кунунӣ мебошад. 

Дар ин чорабинӣ, инчунин, намоиш ва фурӯши навъҳои гуногуни асали занбӯриасалпарварони вилоятҳои Суғду Хатлон ва ноҳияҳои тобеи ҷумҳурӣ манзури харидорон гардонда шуд. Тибқи маълумоти оморӣ ба ҳолати 01.10.2022, дар ҳамаи шаклҳои хоҷагидории ҷумҳурӣ истеҳсоли асал ба 3928,4 тонна расид, ки нисбат ба ҳамин давраи соли гузашта  3,9  дарсад зиёд мебошад. Дар ин рӯз таваҷҷуҳи сокинону меҳмононро бештар асалҳои пешниҳоднамудаи занбӯриасалпарварони асил ба худ ҷалб намуд, зеро дар баробари пешниҳод шудани навъҳои зиёди асали табиӣ, инчунин, тамоми техникаи парвариши он ва таҷҳизоти истифодагардида ба маъраз гузошта шуда буд. Онҳо дар баробари харидани асали тозаи табиӣ, инчунин, аз тавсияи олимону занбӯриасалпарварон низ, баҳраманд гардиданд. Кишоварзон бошанд, дар баробари пешниҳоди дастранҷи худ аз таҷрибаи якдигар баҳравар гашта, аз олимони соҳа тавсияҳои судманд гирифтанд. 

Дар ҷамъбасти намоиш ғолибони озмун, деҳқонон ва иштирокчиёни фаъол барои дастовардҳои шоиста дар соҳаи кишоварзӣ аз рӯи бахшҳои гуногун  бо  сипоснома ва туҳфаҳои хотиравӣ қадр шуданд.                                                                                                                      

 

Матлубаи АБДУҚАҲҲОР, «Ҷумҳурият»