–  Нақшаи ҷамъоварии маблағи истифодаи неруи барқ дар нуҳ моҳи соли ҷорӣ 31 миллиону 879 ҳазору 50 сомонӣ иҷро шуд, ки нисбат ба ҳамин давраи соли пешин 3 миллиону 207 ҳазору 560 сомонӣ зиёд аст, –  гуфт Фарҳод Мирзоев, роҳбари тиҷоратии шабакаҳои барқи шаҳри Кӯлоб дар суҳбат.

Мавсуф афзуд, ки қабули неруи барқ дар 9 моҳи соли равон 254,62 миллион кВт буда, дар қиёс ба ҳамин давраи соли гузашта 11,1 миллион кВт зиёд мебошад. Талафоти неруи барқ дар нуҳ моҳи соли ҷорӣ 3,4 дарсад кам гардида, айни замон 37 дарсадро ташкил медиҳад.

– То кунун аз тарафи назоратчиёни шабакаҳои барқи шаҳри Кӯлоб 1067 санади қоидавайронкунии истифодаи неруи барқ тартиб дода шуда, маблағи он 924 ҳазору 315 сомониро ташкил медиҳад, ки аз ин 451 ҳазору 119 сомониаш рӯйёнда шудааст, – зикр намуд Ф. Мирзоев.

Сардори шабакаҳои барқи шаҳри Кӯлоб Наврӯз Кишваров зимни суҳбат иброз дошт, ки дар нуҳмоҳаи соли равон 160 симчӯби фарсуда бо симчӯбҳои нав иваз гардиданд. Ба гуфтаи мутасаддиён беш аз 30 трансформатори қуввагии 6 – 10/0,4 кВ бо қувваи худӣ аз таъмир бароварда шуда, барои гузарондани фасли сармо омодааст. Масъулон иттилоъ доданд, ки бо мақсади кам кардани талафоти неруи барқ ва бо барқи хушсифат таъмин намудани сокинони шаҳру деҳоти Кӯлоб дар 7 деҳаи шаҳр, трансформаторҳои иловагӣ насб намуданд.

Ба иттилои масъулон, шабакаҳои барқи шаҳри Кӯлоб ба зимистонгузаронӣ пурра омода буда, лавозимоти зарурӣ дар анбори муассиса захира гардидаанд.

 

Суннати СОДИҚ,

“Ҷумҳурият”