Дар ҳоле ки ҷаҳони муосир ба афзоиши таҳдиду хатарҳои терроризму ифротгароӣ бештар рӯ ба рӯ гардидааст, ба хотири ҳифзи манфиатҳои миллӣ, сохти конститутсионӣ ва истиқлоли кишвар тақвияти мубориза алайҳи ин зуҳуроти номатлуб вазифаи на танҳо мақомоти давлатӣ, балки ҳар як шаҳрванди Тоҷикистон мебошад.

Ин матлаб дар ҳамоиш, ки бо ташаббуси раёсати Донишгоҳи давлатии Хуҷанд ба номи академик Бобоҷон Ғафуров таҳти унвони «Усулҳои муосири муқовимат бо ифротгароӣ» дар Кохи матбуоти шаҳри Хуҷанд доир шуд, таъкид гардид. Дар нишаст, ки бо иштироки намояндагони ҳокимияти давлатӣ, мақомоти ҳифзу ҳуқуқу тартибот ва ҳизбҳои сиёсӣ сурат гирифт, оид ба роҳу услуҳои наву муассири муқовимат бо ифротгароӣ, пешгирии дигар зуҳуроти манфӣ, вусъат бахшидани корҳои идеологӣ ва ташаккули мафкураи солим дар ҷомеа табодули афкор сурат гирифт. 

Ректори Донишгоҳи давлатии Хуҷанд ба номи академик Бобоҷон Ғафуров профессор Аюб Усмонзода изҳор дошт, ки раёсати Донишгоҳ дар радифи ниҳодҳои давлатӣ ба масъалаи муқовимат бо ин зуҳуроти номатлуб таваҷҷуҳи хоса зоҳир намуда, дар самти мубориза бо терроризму экстремизм талош мекунад, аз роҳу усулҳои нави таъсиррасон истифода намояд: «Фаъ-олияти маҳфилҳои таҳлилӣ-иттилоотии “Афкор”, илмӣ-иттилоотии “Набзи айём”, тарғиботчиёни ҷавон “Андеша”, “Пайравони Пешвои миллат”, нашри силсилавии китоби “Амнияти ҷомеа: Арзишҳои миллӣ ва динӣ дар муқовимат бо ифротгароӣ”, “Илм ва амнияти миллӣ” аз ҷумлаи иқдомҳои амалии Донишгоҳ дар ин самт аст».

Иттилоъ дода шуд, ки аз оғози соли нави таҳсили 2022 – 2023 тибқи қарори шурои олимони Донишгоҳ барои донишҷӯён курси махсуси муқовимат ба терроризм ва экстремизм роҳандозӣ гардидааст, ки ҳадаф аз он таҳкими донишҳои сиёсӣ, баланд бардоштани маърифати донишҷӯён оид ба мубориза ба ин зуҳуроти номатлуб, пешгирӣ аз шомилшавии ҷавонон ба гурӯҳҳои ифротӣ маҳсуб мешавад. Гузашта аз ин, дар барномаҳои пажӯҳишии илмии Институти илмӣ-тадқиқотии илмҳои ҷомеашиносии назди Донишгоҳ таҳқиқи заминаҳои таърихии ин зуҳуроти номатлуб ва шеваҳои муқовимат бо он, адабиёт ва арзишҳои адабӣ дар муқовимат бо ифротгароӣ ба роҳ монда шудааст, ки маҳсули аввалияи ковишҳои илмии кормандони пажӯҳишгоҳ бо номи “Аз амонӣ гуфтугӯ дорем мо” омодаи чоп аст.

Ҳадаф аз ташкили нишаст бо ҷалби намояндагони мақомоти қудратӣ, ҳифзи ҳуқуқ, мақомоти иҷроияи ҳокимияти давлатӣ, ташкилотҳои ҳизбӣ, ҷомеашиносон ва устодону донишҷӯён баррасии вазъи сиёсии ҷомеа ва тақвияти мубориза бо ифротгароӣ арзёбӣ гардид, ки дар ин бора аз маркази иттилоот ва таҳлили Донишгоҳ ба «Ҷумҳурият» хабар доданд.

 

Фирӯз РАҲМОНИЁН, «Ҷумҳурият»