Вобаста ба вазъи ҷаҳони имрӯза ва боло рафтани  нарху навои маводи ғизоӣ  Президенти мамлакат муҳтарам Эмомалӣ Раҳмон дар Паёми  навбатиашон ба кишоварзон таъкид намуданд, ки аз ҳар як қитъаи замин 2-3 ҳосил гирифта,  ҳар оила  камаш хӯроки дусолаашро захира  бикунад. Дар асоси даъвати Пешвои миллат, мардуми деҳот заминҳои наздиҳавлигиашонро хеле самаранок истифода мебаранд. 

Мутаассифона, дар шаҳрҳо заминҳои холӣ, ки киштукор нашудаанд, хеле зиёд ба назар мерасанд. Ин гуна қитъаҳоро дар назди биноҳои бисёрошёна, қисме аз ташкилоту идораҳо дидан мумкин аст. Воқеан ҳам, аҳён-аҳён нафароне ҳастанд, ки дар назди ин биноҳо дарахт шинонда, сабзавоткорӣ карда, меваву сабзавотро аз бозор намехаранд. Албатта, аҳсан ба чунин ашхоси заҳматписанд, ки бо меҳнати ҳалол ризқу рӯзии аҳли хонадонашонро таъмин месозанд.

Дар ин боб кори директори МТМУ № 53 Бобоев Аскар намунаи ибрат мебошад. Ба чуз он, ки ин таълимгоҳ дар тарбия ва дониши шогирдон миёни мактабҳои шаҳр ҷои сазоворро соҳиб аст, ҳамзамон, ба гулзор кардани роҳравҳо машғул буда, боғи хуби мевадиҳанда бунёд намудааст. Дар байни дарахтон помидор, сабзӣ ва дигар намуди сабзавотҳо мекоранд. Ҳар соле миқдори зиёди каду, ки ғизои хеле сабук ва табобатӣ ба шумор  меравад, мерӯёнанд. Бобоев ҳосили ҷамъовардаашро байни коркунони хоҷагӣ ва омӯзгорон ройгон тақсим мекунад. Хуб мешуд, ки дигар роҳбарони ташкилоту идораҳо аз таҷрибаи  мавсуф истифода баранд. МТМУ № 6 низ чунин таҷрибаро дорад. Боғи бунёднамудаи ин дабистон дорои дарахтони мевадиҳанда буда, ҳар сол аз он ҳосили дихоҳ ба даст меоранд. Ҳамчунин, помидор ва дигар навъҳои сабзавот кишт мекунанд. Аз сифати кори кишоварзии эшон ҳар як бинанда хушҳол мегардад. Чунин як амали самаровар дар МТМУ № 8-и шаҳри Кӯлоб низ, роҳандозӣ шудааст.

Аммо, мутаассифона, бо вуҷуди обӣ будани тамоми қитъаҳои Кӯлобшаҳр заминҳои назди аксар биноҳои истиқоматӣ ва корхонаҳо бекор монда, ба алафзор табдил ёфтаанд. Бовар дорем, ки роҳбарияти нав бо ҳидояти мардуми шаҳрнишин низ, мисли деҳотиён ҳар як порча заминро ба боғу бӯстон мубаддал месозанд. Зеро қитъаҳои ба коркард ниёздошта дар атрофи даҳҳо идораву ташкилотҳои дигар ба чашм мерасанд. 

 

Ғайбулло ҲАЛИМОВ, рӯзноманигор