Росбалт. Дабири кулли СММ Антониу Гутерриш гуфт, ки чолишҳои глобалӣ, низоъҳо ва тағйирёбии иқлим барои СММ аз замони таъсиси ин Созмон ҷиддитарин имтиҳон шудаанд.  

«СММ маҳсули умед аст. Умеди бо азму иродаи қавӣ пеш рафтан пас аз Ҷанги дуюми ҷаҳонӣ ва аз низоъҳои ҷаҳонӣ гузаштан ба ҳамкории ҷаҳонӣ. Имрӯз СММ дар ҳоли озмоиши бесобиқа аст. Аммо он танҳо барои чунин лаҳзаҳо ташкил ёфтааст», – гуфт Гутерриш.

Вай таъкид кард, ки арзишҳо ва принсипҳои Оинномаи Созмони Милали Муттаҳид «дар ҳар гӯшаи ҷаҳон» ба амал татбиқ шаванд. Ба гуфтаи Гутерриш, мо бояд ба низоъҳое, ки ба ҳаёт, оянда ва пешрафти ҷаҳон таҳдид менамоянд, хотима бахшем ва барои аз байн бурдани фақри шадид, коҳиши нобаробарӣ ва наҷоти Ҳадафҳои Рушди Устувор кӯшиш ба харҷ диҳем.

 

 

ХФБ аз ҳамлаи террористӣ дар Пятигорск пешгирӣ кард

Мир 24. Дар шаҳри Пятигорск кормандони Хадамоти федералии бехатарии Россия аз ҳамлаи террористӣ дар шуъбаи полис пешгирӣ намуданд. Омодагии таркишро ҷонибдорони созмони террористии “Давлати исломӣ”(мамнуъ дар Россия) анҷом додаанд.

Аъзоёни гурӯҳ боздошт шуда, ҳангоми кофтуков аз онҳо ҷузъҳои бомба, рамзҳои созмони террористӣ, воситаҳои иртибот бо кураторҳо, ки мукотибаи ошкоршуда бо онҳо қасди ҷиноятиро тасдиқ мекунанд, мусодира гардид. Ба гуфтаи ХФБ, боздоштшудаҳо ба гуноҳашон иқрор гаштаанд. Дар робита ба ин ҳодиса, аз рӯи моддаи «Тайёрӣ ба амали террористӣ» парвандаи ҷиноятӣ боз шудааст.

 

 

Риши Сунак – нахустин Сарвазири ҳиндутабори Британияи Кабир 

Осиёи Марказӣ (CA). Ҳафт ҳафта пас аз шикасти нахустин рақобати худ барои роҳбарии Ҳизби консервативӣ дар соли ҷорӣ, Риши Сунак тавонист дар интихоботи дуюми худ пирӯз шавад. Пас аз он ки ягона рақиби боқимондаи ӯ дар ин мубориза дар бораи даст кашидан аз сабқат эълон кард, ӯ ягона иштирокчии он буд, ки 100 раъйи лозимии ҳамҳизбонашро ба даст овард ва мутаносибан ғолиб гардид. 

Ҳамин тариқ, Сунак дар таърих аввалин Сарвазири ҳиндутабори Британияи Кабир хоҳад шуд. Моҳи август вазири собиқи молия Риши Сунак яке аз пешсафони мубориза барои дарёфти курсии Сарвазир буд, ки дар натиҷаи истеъфои Борис Ҷонсон дар моҳи июл холӣ шуда буд. Аммо, вай он вақт аъзоёни Ҳизби консервативиро бовар кунонда натавонист: онҳо ба ин мақом Лиз Трассро сазовор донистанд ва чунон ки маълум гашт, хато карданд.  

 

 

Роҳбарони Озарбойҷон ва Гурҷистон ҳамкориҳои энергетикӣ ва нақлиётро баррасӣ намуданд

Мир 24. Ҳамкориҳои энергетикӣ мавзуи асосии сафари Президенти Озарбойҷон ба Тифлис шудааст. Бори охир Илҳом Алиев ҳафт сол пеш аз Гурҷистон дидан карда буд.

«Нақлиёт, энергетика, сохтмон – ин ва бисёр дигар соҳаҳо дар маркази таваҷҷуҳи мо қарор доранд. Ташаббусҳои нави ҷониби Озарбойҷон баррасӣ шуданд. Ҳамкориҳои мо таърихи бой доранд”, – гуфт Сарвазири Гурҷистон Ираклий Гарибашвили. 

«Ман хеле шодам, ки бори дигар дар сарзамини азизи Гурҷистон қарор дорам. Мо масъалаҳои хеле муҳимро баррасӣ намудем ва ба зудӣ шаҳрвандони мо манфиати татбиқи онҳоро эҳсос хоҳанд кард”, – иброз дошт Илҳом Алиев.

Роҳбарон вазъияти минтақавию байналмилалӣ ва ҳамкории дутарафаро низ, муҳокима карданд