Дар Институти физикаю техникаи  ба номи  С. Умарови Академияи миллии илмҳо VIII Ҳамоиши байналмилалии «Муаммоҳои муосири физика» доир гардид, ки дар он олимони кишварҳои Федератсияи Россия, Ӯзбекистон, Озарбойҷон ва Чин  ба таври маҷозӣ  ширкат намуданд.  

 

Ибтидо таъкид шуд,  ки мақсад аз роҳандозии Ҳамоиши мазкур  баррасии муаммоҳои муосири илми физика – ҳалли масъала, фарзияҳо ва исботи  дурустии  хулосаҳои илмии бадастомадаи олимони соҳа мебошад. Чорабинии мазкур имкон фароҳам меорад то олимони соҳа  ба ҳам оянд, натиҷаҳои таҳқиқоти илмии худро, ки дар пайи омӯзиш ба даст омадаанд, ба муҳокима пешниҳод созанд.  

Фарҳод Шокир, директори Институт, аз ҷумла гуфт, ки дар кишвари мо ба рушди илмҳои дақиқ, гузарондани корҳои илмӣ – таҳқиқотӣ ва тарбияи олимони ҷавон таваҷҷуҳи хосса зоҳир мегардад. Аз ҷумла,  солҳои охир як зумра  ҷавонон аз ҳисоби Буҷети давлатӣ дар мактабҳои илмии хориҷи кишвар таҳсил намуда, ҳоло дар Институт фаъолият доранд ва Ҳамоиши мазкур имкони хубест барои муаррифии  дастовардҳои нави илмиашон.

Дар Ҳамоиш, ки дар якчанд бахш идома кард, олимон, аз ҷумла мавзуъҳои  хосиятҳои диэлектрикии маҳлулҳои обии электролитҳо,  сигналҳои фотоакустикии маводҳои сахт, динамикаи молекулавии падидаҳои наномиқёс дар таҳқиқи маводи доруӣ ва маводҳои нав, ташаккули объектҳои наноандоза дар монокристаллҳои кремний, усулҳои ҳисоби сохтори электронии маводи нанокомпозитӣ, истифодаи комплексии манбаъҳои барқароршавандаи энергия, моделсозии системаҳои квантӣ бо спини баланд, воридшавии чангу ғубор ба қисмати ҷанубӣ ва марказии Тоҷикистон, таҳлили консентратсияи ҷузъҳои карбон дар аэрозолҳои атмосфера, консентратсияи металлҳои вазнин дар рустаниҳои шифобахши кишвар ва хосиятҳои биологии металлҳои омӯхташуда, технологияи истифодаи антратсит барои истеҳсоли маводи карбон, ҳисобкунии коэффисиенти гармии хӯлаҳои алюминий, таъсири мутақобилаи дохилимолекулярӣ дар пайвастагиҳои гетеросиклиро баррасӣ  намуданд.

Ҳамин тавр, VIII Ҳамоиши байналмилалӣ имкон фароҳам овард то олимони соҳа ба ҳам оянд ва атрофи муаммоҳои муосири физика муколама намоянд.

 

Ф. ФАЙЗАЛӢ, «Ҷумҳурият»