Ин матлабро директори иҷроияи ширкати “МегаФон Тоҷикистон” Анатолий Изюмников дар ҷаласаи 28-уми Шурои роҳбарони мухобироти ИДМ дар Самарқанд баён кард, ки дар чаҳорчӯбаи Ҳафтаи технологияҳои иттилоотиву коммуникатсионӣ сурат гирифт. Ҷаласаи мазкур таҳти раёсати сардори Хадамоти алоқаи Ҷумҳурии Тоҷикистон Бег Зуҳуров доир шуд.

 

Анатолий Изюмников зимни суханронӣ гуфт, ки дар ҳоли ҳозир аз 10 миллион аҳолии кишвар қариб нисфаш аз интернети мобилӣ ва хидматҳои рақамӣ истифода мебаранд. 

- Ҳукумати Тоҷикистон дар назди худ мақсад гузоштааст, ки кишварро ба маркази байналмилалии рақамӣ табдил диҳад ва аз тарҳҳое дастгирӣ мекунад, ки барои иҷрои ин вазифа равона шудаанд. Ҳоло мо як парки IT-ро бунёд ва ҳукумати рақамиро роҳандозӣ карда истодаем. Тоҷикистон барои ҳамкории ҷаҳонӣ дар соҳаи рақамӣ омода аст ва дарвозаҳои худро ҷиҳати аз худ кардани таҷрибаи беҳтарини давлатҳои дигар боз намудааст, - изҳор намуд Анатолий Изюмников.

Бар асоси гуфтаи директори иҷроияи “МегаФон Тоҷикистон”, ин ширкат таъминкунандаи асосии рақамисозӣ дар Тоҷикистон мебошад.

Аъзои Ҳамкориҳои минтақавии мухобироти ИДМ, ки ҷаласаи шурои худро дар Самарқанд баргузор намудаанд, маъмурияти алоқаи 17 кишвари АвруОсиё муаррифӣ мешаванд. Ин иттиҳод вазифаи як мақоми байнидавлатии ҳамоҳангсозиро дар соҳаи табдили рақамӣ иҷро мекунад. 

Дар ҷаласаи мазкур “МегаФон Тоҷикистон” ба ҳайси як ҷузъи калидии раванди рақамикунонӣ муаррифӣ шуд. Гуфта мешавад, 80 дарсади аҳолии Тоҷикистон имкони истифодаи 4G интернет аз операторро доранд. Аз шумораи умумии  3 ҳазор пойгоҳе, ки ширкати «МегаФон» дар Тоҷикистон насб кардааст, 70 дарсади он стандарти баландсуръатро таъмин мекунад. Ин имкон медиҳад, ки шабакаи хизматрасониҳои рақамӣ, аз ҷумла IP-телевизион, тибби онлайн, таҳсилоти онлайн ва варзиши электронӣ васеъ шуда, хизматрасониҳои замонавӣ ҳатто дар ноҳияҳои дурдасти Тоҷикистон муяссар гардад. 

- Имкониятҳои нави рақамӣ ба сифати нави ҳаёт табдил меёбанд, - мегӯяд Анатолий Изюмников. - «Superapp MegaFon Life” ва баъзе дигар хизматрасониҳои рақамӣ, ки дар Тоҷикистон ба роҳ монда шудаанд, барои кишвар ҳодисаи беназиранд. Таҷрибае, ки дар ҷараёни татбиқи чунин лоиҳаҳо ба даст омадааст, дар дигар мамлакатҳои минтақаи Осиёи Марказӣ низ талабгорони худро хоҳад дошт ва ба эҷоди маҳсулоти нав барои миллионҳо одамон мусоидат хоҳад кард, - афзуд ӯ.

 

Мирасрор АҲРОРОВ, «Ҷумҳурият», шаҳри Самарқанд