Дар пасманзари Конфронси байналмилалии сатҳи баланд таҳти унвони “Ҳамкории байналмилалӣ ва минтақавӣ оид ба амният ва мудирияти сарҳад ҷиҳати муқовимат ба терроризм ва пешгирӣ аз таҳарруки террористон” (18 – 19 октябри соли 2022, Душанбе) чанде пеш дар Донишгоҳи миллии Тоҷикистон конфронси байналмилалии илмӣ - амалии «Аз Волга то Ганга тавассути Трансоксиана» баргузор гардид. Ташаббускори ҳамоиш Донишгоҳи миллии Тоҷикистон ва Институти Осиё ва Аврупои Академияи миллии илмҳои Тоҷикистон буданд.

 

Дар конфронс коршиносону муҳаққиқон аз Институти Осиё ва Аврупои АМИТ, Маркази эроншиносии Ҳиндустон, донишгоҳҳои Кобули Афғонистон, Пешовари Покистон, сафири фавқулода ва мухтори Қазоқистон дар Тоҷикистон, намояндагони сафоратҳои Федератсияи Россия, Ҳиндустон ва Ӯзбекистон дар Тоҷикистон, намояндаи Бунёди Горчаков, раиси Фонди миллии “Шоҳроҳи Абрешим – Шоҳроҳи Ваҳдат”  иштирок ва суханронӣ карданд.

Зикр гардид, ки саммити душанбегии Созмони ҳамкории Шанхай ба самтгирии нави Созмон, ки пеш аз Шарқ ба Ғарб ҳаракат мекард, дигаргуниҳои сифатан навро ворид намуд. Бо пайвастани  Ҷумҳурии Исломии Эрон, Ҳиндустону Покистон ва таваҷҷуҳи як қатор кишварҳои арабӣ барои узвият дар ин созмони бонуфузи байналмилалӣ уфуқи нави ҳамкориҳо дар самти “Шимол – Ҷануб” оғоз ёфт. Акнун АвруОсиёи Шимолӣ (Россия) бо АвруОсиёи Ҷанубӣ (нимҷазираи Ҳинд) тавассути Осиёи Марказӣ равобити бисёрҷонибаи худро боз ҳам қавитар месозанд. 

Иштирокчиён зикр карданд, ки мақсади конфронси мазкур, пеш аз ҳама, ҳалли мушкилоти мавҷуда, таҳияи стратегияҳои нави рушд, ба роҳ мондани ҳамкориҳои дуҷонибаву бисёрҷонибаи кишварҳои ба ҳам дӯст дар соҳаҳои иқтисод, сиёсат, фарҳанг, иттилоот, ҳамлу нақл ва бехатарӣ мебошад.

 

Мирсаид РАҲМОНОВ, ходими калони илмии Институти Осиё ва Аврупои АМИТ