«Истиқлол» бори нуҳум ғолиб шуд

Тими «Истиқлол» дар рақобати финалии Ҷоми Тоҷикистон - 2022 бар тими «Кӯктош» пирӯз шуда, бори нуҳум соҳиби ин ҷоиза шуд. 

Вақти асосии вохӯрӣ бо ҳисоби 2:2 анҷом ёфт. Дар ду қисми иловагӣ низ ғолиб муайян нагардид. Дар силсилазарбаҳои 11-метра футболбозони «Истиқлол» бо натиҷаи 5:4 зафар ёфтанд. 

Беҳтарин бозигари финал нимҳимоятгари дастаи «Кӯктош» Алишер Шукуров эътироф гашт.

 

 

 

СУПЕРЛИГАИ ТОҶИКИСТОН – 2022 

Муборизаи «Соро компания» 

ва «Истиқлол» барои медали тилло

Дастаҳои «Соро компания» ва «Истиқлол» ба финали Суперлигаи Тоҷикистон – 2022 оид ба футзал роҳ ёфтанд. Барои медалҳои биринҷӣ «Сипар» ва «Истаравшан» рақобат мекунанд.

Бар асоси низомномаи Лигаи футзали Тоҷикистон, бозиҳои ниҳоии Суперлигаи кишвар аз силсилаи то се пирӯзии яке аз дастаҳо иборат буда, вохӯрӣ барои ҷойи сеюм дар формати то ду ғалаба баргузор мешаванд. 

ҶОМИ ОСИЁ – 2023

Корея, Урдун ва Уммон ҳарифони футболбозони ҷавони тоҷик

Тибқи қуръакашии марҳилаи финалии Ҷоми Осиё – 2023 (1 – 18 март, Ӯзбекистон), мунтахаби ҷавонони Тоҷикистон (U-20) шомили гурӯҳи “С” шуда, бо дастаҳои Корея, Урдун ва Уммон бозӣ мекунад.

Дар рафти қуръакашӣ, ки 26 октябр дар шаҳри Тошкент доир гашт, 16 даста ба 4 гурӯҳи чордастаӣ тақсим шуданд. Чор дастаи беҳтарини Чемпионати Осиё ба Чемпионати ҷаҳон, ки соли оянда дар Индонезия баргузор мешавад, роҳхат мегиранд.

 

 

 

ATP 500 

Пирӯзии Даниил Медведев

Теннисбози рус Даниил Медведев (ракеткаи 4-ум) дар зӯрозмоии ниҳоии мусобиқаи ATP 500-и Вена (Австрия) Денис Шаповалови канадагиро (19-ум) бо ҳисоби  2:1 (4:6;  6:3;  6:2) шикаст дода, қаҳрамони мусобиқа гардид.

Тибқи иттилои сомонаи www.sports.ru, ин дуюмин ҷоизаи Даниил дар мавсими ҷорӣ буда, дар маҷмуъ, 15-умин ҷоизаашро ба даст овард.

Пас аз ин музаффарият, теннисбози рус ба мақоми 3-юми раддабандии ATP мебарояд.

 

Маҳмуд БАҲРОМ, шореҳи варзиш