Дар шаҳри Ҳисор даври минтақавии Озмуни ҷумҳуриявии “Фурӯғи субҳи доноӣ китоб аст” ҷамъбаст гардид. Озмуни мазкур бо иштироки довталабон аз 8 шаҳру ноҳияи тобеи ҷумҳурӣ – Ҳисор, Турсунзода, Ваҳдат, Шаҳринав, Роғун, Варзоб, Рӯдакӣ ва Файзобод аз рӯи панҷ номинатсия баргузор шуда, ғолибони даври минтақавӣ муайян гардиданд.

 

Озмун шаффофу одилона баргузор гардида, ҳакамон малакаву дониши беш аз 300 нафар иштирокчиро санҷида, аз байни онҳо беҳтаринҳоро интихоб карда, ба даври ҷумҳуриявӣ роҳхат доданд.

Зимни ҷараёни Озмун муовини Сарвазири мамлакат Матлубахон Сатториён ва раиси шаҳри Ҳисор Қосим Роҳбар бо ҳакамону иштирокчиёни он вохӯрда, вобаста ба шароиту имконияти фароҳамгардида ва мушкилоташон дар раванди Озмун суҳбат намуданд.

Бунафша Юлдошзода, муовини раиси шаҳри Ҳисор, зимни суханронӣ ҳайати ҳакамон ва иштирокчиёну меҳмононро ба шаҳри Ҳисор хайрамақдам гуфта, иброз дошт, ки Озмуни мазкур бо ташаббус ва таҳти сарпарастии Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади шинос  намудани наврасону ҷавонон ба мероси бою ғанӣ ва муаррифии таъриху фарҳанги пурғановати халқи тоҷик роҳандозӣ гардида, он ҳамчун роҳкушои дари ошёни ақлу хирад  барои баланд бардоштани завқи китобхонию китобдӯстӣ ва, дар маҷмуъ, ба маърифати фарҳангии миллат мусоидат хоҳад кард.

Аскар Ҳаким, сарходими илмии шуъбаи адабиёти муосири Институти забон ва адабиёти ба номи Абуабдулло Рӯдакии Академияи миллии илмҳои Тоҷикистон, ки раисии ҳайати ҳакамонро бар уҳда дошт, ба роҳбарияти Мақомоти иҷроияи ҳокимияти давлатии шаҳри Ҳисор  барои мусоидат ҷиҳати дар сатҳи баланди маънавию ташкилӣ баргузор гардидани Озмун изҳори сипос намуд. Ҳамчунин, ӯ баён дошт, ки дар Озмун ҳамаи иштирокчиён баранда буданд ва касе аз иштирок дар он бохт накардааст. Чунки бо хондани китобу аз бар кардани шеъру достонҳо маънавиёти шахс баланд мешавад ва китобхонию сухандонӣ дар интихоби роҳи дурусти зиндагӣ, пайдо намудани мавқеъю мартаба дар ҷомеа аҳамияти хос дорад.

Тибқи иттилои раиси ҳакамон, аз миқдори умумии иштирокчиёни Озмун ба даври ҷумҳуриявӣ 79 нафар роҳхат гирифт, ки 15 нафараш аз шаҳри Ҳисор мебошад. Дар ҷадвали ишғоли ҷойҳои ифтихорӣ шаҳри Ваҳдат дар ҷойи аввал ва шаҳри Ҳисор дар ҷойи дуюм қарор  гирифтанд.

 

Матлубаи АБДУҚАҲҲОР, «Ҷумҳурият»