Пахтакорӣ яке аз соҳаҳои асосӣ ва муҳими кишоварзӣ ба ҳисоб рафта, дар таъмини корхонаҳои саноатии кишвар бо ин ашёи хоми гаронбаҳо аҳамияти калидӣ дорад. Аз дигар ҷиҳат пахта ба хоҷагиҳои пахтакор манфиати хуби молиявӣ оварда, барои ғанӣ гардидани буҷети маҳаллӣ мусоидат мекунад. Бо назардошти сол ба сол сердаромад гардидани соҳаи пахтакорӣ, инчунин, ҷиҳати татбиқи барномаи стратегии паст кардани сатҳи камбизоатӣ ва таъсиси ҷойҳои нави кор, майдони кишти пахта васеъ ва истеҳсоли он дар кишвар бамаротиб зиёд мегардад. 

 

Тавре муовини аввали раиси ноҳияи Данғара Холзода Каромиддин Камолиддин ба хабарнигори махсуси «Ҷумҳурият» иттилоъ дод, пахтакорони зафарпешаи ноҳия дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро дар хусуси оқилона истифода бурдани замин амалӣ карда, имсол майдони ин зироати сердаромадро 170 гектар зиёд намуданд. 

– Ба ҳамагон маълум аст, ки пахта зироати хеле нозук ва заҳматталаб буда, танҳо бо роҳи риояи қатъии қоидаҳои агротехникӣ   ҳосили хуб ба даст овардан, имконпазир аст. Имсол пахтакорони ноҳия тухмиҳои аълосифати навъҳои гуногуни чинӣ, инчунин, «Флора», «Хатлон – 14», «Хуҷанд», «Флеш» ва «Ирам»-ро, ки ба иқлими ноҳия мутобиқанд, кишт намуданд. Дар давраи нашъунамо, гулу шона ҷиҳати ҳифз аз ҳар гуна ҳашаротҳои зараррасон, аз  ҷумла тортанакҳо ва шира, ки боиси талаф ёфтани ҳосил мегардад, аз заҳрхимикатҳо самаранок истифода бурда, дар мавсими ҳосилғундорӣ ба натиҷаҳои баланди истеҳсолӣ ноил шуданд, – афзуд Холзода Каромиддин Камолиддин. 

Пахтакорони зафарпешаи ноҳия бо сари баланд аз иҷрои нақшаи пахта мужда расонда, аз майдони 4 ҳазору 850 гектар ба ҷои 10 ҳазору 978 тонна беш аз 11 ҳазор тонна пахтаи аълосифат чамъоварӣ намуда, онро ба бузургтарин корхонаи нассоҷии Ҷамъияти саҳомии пӯшидаи «Ҷунтай Данғара син– силу Текстил» супурданд. Корхона ҳар як тонна пахтаи бо заҳмати зиёд чидаи хоҷагиҳои пахтакорро бо нархи 10 ҳазор сомонӣ мехарад.   

Бояд гуфт, ки сари вақт таъмин намудани кишоварзон бо оби полизӣ, яке аз омилҳои асосии иҷрои дурнамои пахта дар ноҳия гардид. Пахтакорон имсол аз об танқисӣ накашиданд. Муассисаи давлатии Нақби оби Данғара ва идораи беҳдошти замин ва обёрии ноҳия   хоҷагиҳои пахтакорро  аз аввали мавсим бо оби полизӣ таъмин намуда, дар иҷрои дурнамои ноҳия саҳми калон гузоштанд. Натиҷаи ҳамин заҳматҳои мардони арсаи меҳнат  буд, ки ҳосилнокӣ аз ҳар гектар ба 22,5 сентнер расид. Дар ин дастовардҳои баланди меҳнатӣ, саҳми хоҷагиҳои деҳқонӣ ва кооперативҳои истеҳсолии «Раҳмонҷон», «Сомонҷон», «Муҳсинҷон», ҷамоатҳои деҳоти Сангтӯда, Оқсу, Корез, Исмат Шарифов ва Лолазор назаррас мебошад.   

Бино ба иттилои Холзода Каромиддин Камолиддин, имрӯзҳо дар қитъаҳои пахта 300 хоҷагии пахтакор ва зиёда аз 4 ҳазор чинакчӣ баҳри иҷрои уҳдадориҳо азму талош доранд. Деҳқонон аз рӯзҳои офтобии фасли тирамоҳ самаранок истифода бурда, ҳамарӯза ба нуқтаҳои қабул аз 100 то 150 тонна пахтаи хушсифат месупоранд. Ба ҳар кило пахтаи чидашуда ба чинакчиён аз 1 то 1,5 сомонӣ музди меҳнат медиҳанд. 

 

Холназар КАСИРОВ, 

«Ҷумҳурият»