Мир 24. Ба иттилои шабакаи телевизионии “МИР 24”, Президенти Беларус Александр Лукашенко бо Дабири кулли СААД Станислав Зас оид ба мушкилот дар ин Соз-мон суҳбат кард ва даъват намуд, ки кор дар чаҳорчӯбаи СААД фаъол гардонда шавад.  

Ба гуфтаи Лукашенко, кишварҳои беруна ба масоили СААД дахолат менамоянд. Аз ин рӯ, иттифоқчиёнро лозим аст, ки бо ҳам пайваста, гуфтушунид карда,  қарорҳои қабулшударо рӯи коғаз нагузоранд, балки онҳоро амалӣ созанд.  

«Талаби Сарвари давлат маъмулан сода ва фаҳмо аст. Авлавиятҳо набояд абстрактӣ ва сохта бошанд. Онҳо бояд маҳз бо ҳамон мушкилоте бархӯрд намоянд, ки ҳоло дар рӯзномаи Созмони мо қарор доранд”, – гуфт Дабири кулли СААД. Мо, ҳамчунин, мавзуъҳои нишасти дарпешистодаи СААД-ро баррасӣ кардем.  

 

 

Изҳороти Сарвари Шурои давлатии Чин

 

RT. Сарвари Шурои давлатии Чин Ли Кэсян дар ҷаласаи Шурои сарварони ҳукуматҳо – сарвазирони кишварҳои узви СҲШ изҳор дошт, ки Чин омода аст, ҳамкориҳоро бо кишварҳои узви Созмони ҳамкории Шанхай  дар бахши амният амиқтар созад.

"Чин якҷо бо ҷонибҳои дигар барои амиқтар кардани ҳамкориҳои амниятӣ ва ҳифзи ҳуқуқ ҷиҳати таъмини рушди иқтисодӣ ва иҷтимоии ҳар як кишвар омода аст", – иброз дошт Ли Кэсян. Вай, ҳамчунин, дар бораи зарурати эҷоди як навъи кушоди иқтисоди ҷаҳонӣ ва сода кардани расмиёти тиҷорати байналмилаливу сармоягузорӣ сухан гуфт.

 

 

СММ: “Тавлиди афюн дар Афғонистон 32 дарсад афзудааст”

 

ТАСС. Бино ба маълумоти дар гузориши рӯзи сешанбе нашршудаи Идораи СММ оид ба маводи мухаддир ва ҷинояткорӣ (UNODC), ҳаҷми тавлиди афюн дар Афғонистон пас аз ба қудрат расидани ҳаракати радикалии “Толибон” дар ин кишвар 32 дарсад афзудааст. 

Тибқи ин гузориш, кишти афюн дар Афғонистон ба 233 ҳазор гектар расидааст. Даромади фермерҳо аз истеҳсоли афюн дар соли гузашта се маротиба афзуда, аз 425 миллион доллари амрикоӣ дар соли 2021 то 1,4 миллиард доллари амрикоӣ дар соли 2022 зиёд шудааст. Аммо ин маблағ танҳо як бахше аз даромади тавлид ва тиҷорати афюн дар дохили Афғонистонро ташкил медиҳад.

"Мусодираи афюн дар Афғонистон нишон медиҳад, ки фурӯши ғайриқонунии афюн ва ҳероини Афғонистон ҷилавгирӣ нашудааст. Афғонистон 80 дарсади ниёзи ҷаҳониро ба афюн таъмин мекунад",– омадааст дар гузориш.