Муассисаи «Шабакаи гармидиҳандаи шаҳри Душанбе» ҷиҳати бе мушкилӣ гузарондани мавсим, пайваст намудани иншоот ва биноҳои нави истиқоматӣ ба шабакаҳои гармидиҳии шаҳр ҳамасола чорабиниҳои саривақтиро роҳандозӣ менамояд. Муассиса тибқи нақша дар мавсими зимистони имсола бо гармӣ таъмин намудани  3000 иншоотро ба нақша гирифтааст, ки нисбат ба соли гузашта 219 иншоот зиёд мебошад.

Тавре  Абдуҷаббор Ёров, директори Муассисаи «Шабакаи гармидиҳандаи шаҳри Душанбе», изҳор дошт, ба ҳолати 2 ноябри соли равон  ба 2 984 иншоот (89,5 дарсади  нақша) энергияи гармӣ интиқол дода шудааст. Аз ҷумла, дар ноҳияҳои Исмоили Сомонӣ 544 иншоот, Шоҳмансур 658,  Сино 1346 ва Фирдавсии пойтахт 452 иншоот бо гармӣ таъмин гардид.  

Мавриди зикр аст, ки бо ғамхорию дастгирии Ҳукумати мамлакат ва раиси  шаҳри Душанбе  пойтахти кишвар рӯз ба рӯз ободу зебо гашта, иншооти зиёди муосири ҷавобгӯ ба талаботи замон қомат афрохта истодааст. Бо назардошти ин, дар мавсими имсола дар ноҳияҳои Сино 41 иншоот, Шоҳмансур 145, Исмоили Сомонӣ 26, Фирдавсӣ 5 иншооти нав бо гармӣ таъмин хоҳад шуд.

Қобили зикр аст, ки нархҳои хизматрасонии гармидиҳӣ дар мавсими имсола тағйир наёфтаанд.  

– Мувофиқи қонунҳои амалкунанда, сарҳади  Муассисаи мазкур то таҷҳизоти гармитақсимкунии бино (элеватор) муайян шудааст. Тамоми шабакаҳои баъди элеватор ҷойгиршуда (шабакаҳои таҳхонаи бино, лӯлаҳо ва шабакаҳои дохили ҳуҷра) аз ҷониби соҳибмулкони манзил таъмир, барқарор ва нигоҳубин мешаванд. Бо назардошти ин, сокинони биноҳо бояд дар ин раванд масъулият эҳсос намуда, бепарвоӣ ва хунукназарӣ накунанд, зеро дар акси ҳол дар ин давра барои кормандони Муассиса ва худи сокинон низ мушкилӣ эҷод мегардад, – гуфт Абдуҷаббор Ёров.

Дар Муассиса имрӯзҳо кори хадамоти танзимгарии садамавии шабонарӯзӣ ба роҳ монда шуда, аз ҳисоби кормандони роҳбарикунанда навбатдорӣ ташкил гардидааст. Айни ҳол дар тамоми минтақаҳои шаҳр гурӯҳҳои батанзимдарории реҷаи интиқоли гармӣ фаъолият менамоянд ва чорабиниҳо оид ба пайваст кардани иншооти дигар ва иҷрои корҳои ба танзим даровардани реҷаи гармидиҳӣ идома доранд. Масъулони соҳа баҳри иҷрои вазифаҳои дар назди соҳа гузошташуда ва дар сатҳи баланди ташкилӣ гузарондани мавсими имсола кӯшиш менамоянд, то ки бо заҳмати худ хонаҳои мардумро гарму чароғон созанд. 

 

Матлубаи АБДУҚАҲҲОР,  “Ҷумҳурият”