маориф
Таҷрибаи донишгоҳ ба мактабҳои олии кишвар тавсия шуд
-Дар ибтидои соли хониши ҷорӣ ба мақсади иҷрои барномаҳои давлатӣ аз рӯи 4 ихтисоси нав: парандапарварӣ, моҳипарварӣ, беҳдошти ветеринарӣ ва бунёди чаманзор донишҷӯёнро қабул намудем ва ҳамин тавр шумораи ихтисосҳо ба 30 адад расид,- гуфт Саидалӣ Гулов, ноиби ректори Донишгоҳи аграрии Тоҷикистон оид ба таълим, профессор, дар нишасти матбуотӣ.
Мавсуф иброз дошт, ки ба донишгоҳ 1598 нафар донишҷӯ, аз ҷумла 58 нафар тибқи квотаи президентӣ қабул шуд. Алҳол 49 нафар доктору профессор ва 145 номзаду дотсент ба таълиму тарбияи толибилмон машғуланд. Яке аз масоили муҳими сессияи тобистона ин тарзи қабули тестӣ ва комиссионӣ мебошад, ки он шаффоф ва воқеъбинона гузаштани санҷишу имтиҳонҳоро таъмин менамояд.
Таҷрибаи қабули тестӣ дар донишгоҳ аз ҷониби Вазорати маориф ва шӯъбаи илм ва маорифи Дастгоҳи иҷроияи Президенти ҷумҳурӣ маъқул ва барои амалӣ намудани он дар дигар мактабҳои олӣ тавсия шуд.
Саидалӣ Гулов тазаккур дод, ки чунин тарзи қабул на танҳо ба дараҷаи донишандӯзии толибилмон баҳо медиҳад, балки яке аз роҳҳои муайян намудани сатҳи методии дарсдиҳии омӯзгорон низ мебошад.
Назар ба гуфти ноиби ректор робитаи илм бо истеҳсолот хеле қавист. Бо ин мақсад баҳри боз ҳам беҳтар намудани пойгоҳи моддӣ- таълимии донишгоҳ дар 9 моҳи соли ҷорӣ 6 озмоишгоҳи илмӣ- таълимӣ- истеҳсолӣ бунёд шуд. Дастовардҳои илмии олимони донишгоҳ дар истеҳсолот татбиқ мегарданд. Пахтаи навъи «Зарафшон-1» барои таҷрибагузаронӣ пешниҳод шудааст.
М. САФАР, «Ҷумҳурият»
Баёни ақида (0) Санаи нашр: №: Мутолиа карданд: 7147
