Ғаллакорӣ яке аз соҳаҳои асосии кишоварзии мамлакат ба ҳисоб рафта, дар таъмини амнияти озуқаворӣ, бозори истеъмолӣ бо ғаллаи хушсифати ватанӣ мавқеи махсусро ишғол менамояд. Аз ин рӯ, ҳар сол олимони соҳа барои ба даст овардани ҳосили дилхоҳ роҳу усулҳои навро ҷустуҷӯ мекунанд.

 

Тавре муовини аввали раиси ноҳияи Данғара Каромиддин Холзода ба рӯзномаи «Ҷумҳурият» иттилоъ дод, Данғара дар соҳаи ғаллакорӣ яке аз ноҳияҳои калонтарини мамлакат ба ҳисоб рафта, дар сиёсати аграрии кишвар нақши ҳалкунанда мебозад. Имсол ғаллакорони ноҳия дар ҳамдастӣ бо олимони соҳа аз навъҳои тухмиҳои хушсифати «Садоқат», «Ласточка», «Краснодар-99», «Фарғона» ва тухмии маҳаллии «Ормон», ки ба иқлими ноҳия мутобиқанд, истифода бурда, дар мавсими ҷамъоварӣ ба натиҷаҳои хуби истеҳсолӣ комёб гаштанд. Онҳо аз майдони 27 ҳазору 589 гектар зиёда аз 92 ҳазору 55 тонна ғаллаи хушсифат ҷамъоварӣ намуда, ҳосилнокиро аз ҳар гектар ба 33 сентнер расонданд. 

Дар ин ҷода саҳми кооперативҳои истеҳсолии «Сомонҷон», «Раҳмонҷон» ва «Муҳсинҷон» хеле назаррас мебошад. Ҳамзамон, барои аз зимистони солҳои 2022-2023 солиму фарбеҳ ва бо маҳсулнокии баланд баровардани чорвои ҷамъиятӣ кишоварзони ноҳия то имрӯз ба миқдори 143,1 ҳазор тонна хӯроки дурушт ва 6 ҳазору 135 тонна хӯроки ширадори силос захира намудаанд. 

– Ҳоло дар ноҳия шудгори заминҳо бомаром идома дошта, кишоварзон аз тамоми техникаҳо самаранок истифода мебаранд. Онҳо мақсад доранд, ки барои ҳосили пурғановати соли оянда таҳкурсии боэътимод гузошта, дар таъмини амнияти озуқавории мамлакат саҳми арзанда гузошта, истеҳсоли ғалларо ба 100 ҳазор тонна расонанд. То имрӯз 4 ҳазору 680 гектар замин дар асоси қоидаҳои агротехникӣ шудгор шудааст, – афзуд Каромиддин Холзода.

 

Холназар КАСИРОВ, «Ҷумҳурият»