14 ноябр дар шаҳри Душанбе ҷаласаи навбатии муштараки ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон оид ба муайянкунӣ ва аломатгузории сарҳади давлатии ду кишвар, таҳти роҳбарии раиси Кумитаи давлатии амнияти миллии Ҷумҳурии Тоҷикистон Саймумин Ятимов ва муовини Сарвазир – раиси Кумитаи давлатии амнияти миллии Ҷумҳурии Қирғизистон Қамчибек Тошиев баргузор гардид, - хабар медиҳад АМИТ «Ховар».

Аз натиҷаи нишаст протоколи дахлдор ба имзо расида, ҷонибҳо ба мувофиқа омаданд, ки ҷаласаи навбатии комиссия дар ҳудуди Қирғизистон доир шавад. 

 

 

Имзои ёддоштҳои табодулӣ

Вазири корҳои хориҷии Ҷумҳурии Тоҷикистон Сироҷиддин Муҳриддин сафири фавқулода ва мухтори Ҷопон дар Тоҷикистон Тошиҳиро Аикиро ба ҳузур пазируфт. Дар ин дидор вазъи кунунӣ ва дурнамои рушди муносибатҳои дуҷониба, аз ҷумла масоили ҳамкориҳо дар чаҳорчӯбаи созмонҳои байналмилалӣ, мавриди баррасӣ қарор гирифтанд.

Ба иттилои Вазорат, пас аз анҷоми мулоқот маросими имзои ёддоштҳои табодулӣ байни Ҳукумати Тоҷикистон ва Ҳукумати Ҷопон роҷеъ ба лоиҳаи “Бурсияҳои таҳсилӣ барои рушди захираҳои инсонӣ (JDS)” дар чаҳорчӯбаи кумакҳои бебозгашти Ҷопон (ODA) баргузор гардид.

 

 

Вохӯрии Баҳодур Шерализода бо Самеҳ Ваҳба 

Раиси Кумитаи ҳифзи муҳити зист Баҳодур Шерализода дар ҳошияи Конфронси 27-уми ҷонибҳои Конвенсияи Созмони Милали Муттаҳид оид ба тағйирёбии иқлим (КОП-27) дар шаҳри Шарм-уш-Шайхи Ҷумҳурии Мисри Араб бо директори минтақавии Бонки ҷаҳонӣ оид ба рушди устувор барои кишварҳои Аврупо ва Осиёи Марказӣ Самеҳ Ваҳба вохӯрд.

Бо мақсади ноил гардидан ба ҳадафҳои асосии Тоҷикистон, ки дар стратегия ва барномаҳои миллӣ дар самти беҳтар намудани хизматрасониҳои обуҳавошиносӣ муайян гардидаанд, аз ҷониби раиси Кумитаи ҳифзи муҳити зист пешниҳод шуд, ки масъалаи ҷудо намудани маблағҳои иловагӣ дар доираи Лоиҳаи “Навсозии хизматрасонии обуҳавошиносӣ дар Осиёи Марказӣ (маблағгузории иловагӣ), Ҷузъи С” баррасӣ шавад. Ҳамзамон, масъалаи расондани кумаки техникӣ дар самти мониторинги ҳавои атмосфера муҳокима гашт.

Раиси Кумита бо мақсади татбиқи саҳми дар сатҳи миллӣ муайяншудаи Тоҷикистон оид ба коҳиш додани ихроҷи газҳои гулхонагӣ Бонки ҷаҳониро барои дастгирии татбиқи ҳуҷҷати мазкур даъват намуд.

 

 

Таҷлили санаҳои таърихии Тоҷикистон дар Берлин

Сафорати Тоҷикистон дар шаҳри Берлин ба ифтихори Рӯзи Конститутсия, 30-юмин солгарди Иҷлосияи XVI Шурои Олӣ, Рӯзи Президенти Ҷумҳурии Тоҷикистон ва Рӯзи Парчами давлатӣ чорабинии тантанавиро бо ҳузури тоҷикистониёни муқими Олмон баргузор намуд.

Сафири Тоҷикистон дар Олмон Имомудин Сатторов зимни суханронӣ вобаста ба дастовардҳои Тоҷикистон дар даврони Истиқлолият ва нақши Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар барқарор намудани сулҳу суботи комил, ваҳдату пойдории миллӣ ва инкишофи иқтисодиву иҷтимоӣ, таъкид намуд.

Инчунин, дар чорабинӣ филми мустанад оид ба дастовардҳои Тоҷикистон намоиш дода шуд.

 

 

Комил Мирзоалӣ президенти Федератсияи бокс интихоб шуд

Дар Кумитаи миллии олимпӣ ҷаласаи ғайринавбатии интихоби президенти Федератсияи бокси Тоҷикистон баргузор шуд, ки дар он истеъфои президенти федератсия Бег Сабур тасдиқ гардида, номзадии Комил Мирзоалӣ ба ҳайси президенти нави Федератсияи бокс пешбарӣ ва аз ҷониби аъзои федератсия интихоб гардид. 

Ба иттилои Кумитаи миллии олимпӣ, Комил Мирзоалӣ ба иштирокчиёни ҷаласа барои боварӣ изҳори миннатдорӣ карда, иброз дошт: “Ба Бег Сабур барои иҷрои вазифаҳояш дар мақоми президенти Федератсияи бокс изҳори сипос мекунем. Дастоварди варзишгарони мо дар чанд соли охир назаррас аст. Талош меварзем, ки комёбиҳо боз ҳам бештар шаванд ва ин бе дастгирӣ ва ҳамкории якҷояи мураббиён имконпазир нахоҳад шуд”.