Шоҳигарии Арабистони Саудӣ аз аввалин кишварҳое буд, ки соҳибихтиёрии Ҷумҳурии Тоҷикистонро ба расмият шинохт. Тоҷикистон Арабистони Саудиро ҳамчун шарики муҳим дар Ховари Миёна ва ҷаҳони ислом мешиносад ва ба таҳкими ҳамкориҳои мутақобилан судманд бо он ҳавасманд аст. Робитаи ҳасанаи Душанбе ва Ар-Риёз аз паёмҳои маънавии таърихӣ ва, инчунин, муносибатҳои бародаронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва ходими Ҳарамайни Шарифайн Шоҳ Салмон ибн Абдулазиз ал-Сауд Шоҳи Арабистони Саудӣ сарчашма мегирад.

Ин нуктаро Манучеҳр Шарифзода, муовини вазири фарҳанги Ҷумҳурии Тоҷикистон, зимни таҷлили 30-солагии муносибатҳои дипломатии Тоҷикистон ва Арабистони Саудӣ дар Театри давлатии академии опера ва балети ба номи Садриддин Айнӣ иброз дошт. 

Ӯ афзуд, ки муносибатҳои дӯстона ва ҳамкориҳои судманди Тоҷикистону Арабистони Саудӣ тайи солҳои сипаришуда масири рушди бемайлонро касб карда, имрӯзҳо бар пояи арзишҳои муштараки тамаддунӣ ва усулҳои мутақобил, ҳамдигарфаҳмӣ ва ҳусни ният дар ҳама самтҳои мавриди эҳтимоми тарафайн уфуқҳои навро фаро мегирад.

Валид ибни Абдураҳмон ар-Рушайдон, сафири фавқулода ва мухтори Шоҳигарии Арабистони Саудӣ дар Ҷумҳурии Тоҷикистон, Арабистони Саудиро шарики рушди Тоҷикистон унвон намуда, доир ба ҳамкориҳои дуҷонибаю бисёрҷониба, таҳкими ҳамкориҳои ду кишвар дар тамоми соҳаҳо, аз ҷумла иқтисодӣ, тиҷорат, сармоягузорӣ, фарҳанг, маориф, варзиш ва амният, ибрози назар кард. 

Дар чорабинӣ филми мустанад аз рафти ҳамкории 30-солаи ду кишвар ба намоиш гузошта шуд. Қисмати фарҳангиро аҳли ҳунари кишвари дӯст бо сози “Алсимсимия”, ки онро бештар мардуми саҳронишин менавозанд, оғоз намуда, рақси “Мизмор” ва дигар навъи ҳунармандии Арабистони Саудиро ба маъраз гузоштанд. Ҳунармандони Тоҷикистон саҳнаро бо рақсу мусиқӣ ва созҳои тоҷикона ҳусн бахшиданд.

 

Оламбегими НЕКҚАДАМ, “Ҷумҳурият”