Як гурӯҳ соҳибкорони турк бо роҳбарии сафири фавқулода ва мухтори Ҷумҳурии Туркия дар Ҷумҳурии Тоҷикистон Эмре Зеки Карагёл ҷиҳати шиносоӣ бо вазъи иқтисодӣ, имкониятҳои мавҷуда барои рушди соҳибкорӣ, омӯзиши фазои сармоягузорӣ ба вилояти Суғд ташриф оварданд. 

Ба иттилои хадамоти матбуоти раиси вилоят, соҳибкорони турк дар меҳмонхонаи «Суғдиён» дар бизнес- форум ширкат варзида, бо ҳамтоёни тоҷики худ роҳҳои рушди ҳамкориҳоро баррасӣ карданд.

Муовини раиси вилоят Анвар Яъқубӣ изҳор дошт, ки ҳаҷми гардиши савдо миёни вилояти Суғди Ҷумҳурии Тоҷикистон ва Ҷумҳурии Туркия сол ба сол зиёд мегардад. Ташрифи соҳибкорони турк барои таҳкими равобити иқтисодӣ мусоидат мекунад ва соҳибкорони ду кишвар дар амалӣ намудани тарҳҳои муштарак ташаббус нишон медиҳанд. Зикр шуд, ки дар вилоят барои рушди соҳибкорӣ фазои мусоид фароҳам буда, бо ташаббуси Президенти Ҷумҳурии Тоҷикистон муҳтарам Эмомалӣ Раҳмон саноатикунонии босуръати кишвар ҳадафи стратегӣ эълон гардидааст. Дар ин раванд вилоят ҳавасманди густариши робитаҳо бо шарикони рушд аст. Ташкили корхонаҳои муштарак, ҷалби таваҷҷуҳи сармоягузорон ба бунёди корхонаҳои нав, ворид намудани хатҳои нави истеҳсолӣ, ба роҳ мондани истеҳсоли маҳсулоти воридотивазкунанда ва ба содирот нигаронидашуда имкон фароҳам овард, ки дар амалӣ шудани ҳадафҳои созандаи давлату Ҳукумат саҳм гузошта шавад. 

Ба маълумоти мавҷуда ҳаҷми гардиши савдои хориҷии вилояти Суғд дар моҳҳои январ – сентябри соли равон ба 2 миллиарду 300,1 миллион доллар баробар гардида, суръати афзоиш нисбат ба ҳамин давраи соли 2021 – ум 143,1 фоиз таъмин шудааст. Бо мақсади фароҳам овардани имконоти мусоиди инвеститсионӣ дар доираи ҷалби сармояи дохилию хориҷӣ танҳо давоми нуҳ моҳи соли ҷорӣ ба иқтисодиёти вилоят ба маблағи қариб 172 миллион доллар сармояи ватанию хориҷӣ ҷалб гардида, аз ин наздик ба 154 миллион доллар сармояи хориҷӣ мебошад. 

Ҳоло дар вилоят як қатор корхонаҳои муштараки Тоҷикистону Туркия фаъолият доранд ва умед аст, ки теъдодашон боз ҳам меафзояд. 

Меҳмонон ҳавасмандии худро барои амалишавии лоиҳаҳои нав баён дошта, бо фаъолияти корхонаҳои саноатии Минтақаи озоди иқтисодии «Суғд», шаҳрҳои Хуҷанд, Истаравшан, Гулистон, Бӯстон ва ноҳияҳои Бобоҷон Ғафуров, Ҷаббор Расулов дидан намуда, бо соҳибкорони тоҷик дидору мулоқот анҷом доданд. Меҳмонон, ҳамзамон, аз минтақаҳои сайёҳиву фарҳангӣ ва таърихии вилоят боздид намуда, бо имкониятҳои соҳаи сайёҳӣ ошно шуданд. 

 

Нигина РАҲМОН, «Ҷумҳурият»