Аз 22 то 26 ноябр Рӯзҳои фарҳанги Тоҷикистон дар Туркманистон баргузор мегарданд. Ҳайати Тоҷикистон иборат аз 80 ҳунарманд таҳти роҳбарии вазири фарҳанг Зулфия Давлатзода ба Туркманистон сафар намуд, - иттилоъ дод маркази матбуоти вазорат.

Дар ҷараёни баргузории Рӯзҳои фарҳангӣ вохӯрии вазири фарҳанги Тоҷи-кистон бо вазири фарҳанги Туркманистон, се барномаи консертӣ, намоиши либосҳои миллӣ, ҳунарҳои мардумӣ, санъати тасвирӣ ва аксҳои манзараҳои зебои Тоҷикистон дар назар аст.

Рӯзҳои фарҳангӣ дар шаҳрҳои Ашқобод ва Марии Туркманистон доир гардида, ансамблҳои «Лола», «Парасту», созҳои миллӣ, ҳунармандони маъруфи кишвар, мусаввирони бомаҳорати ҷумҳурӣ бо барномаҳои рангину ҷолиб назди тамошобинони ин шаҳрҳо ҳунарнамоӣ менамоянд.

 

 

Иштироки ҳайати Тоҷикистон  дар Конфронси мубориза бо маблағгузории терроризм

Ҳайати Ҷумҳурии Тоҷикистон таҳти роҳбарии муовини якуми вазири корҳои дохилӣ Абдураҳмон Аламшозода дар Конфронси вазирон ҷиҳати мубориза бар зидди маблағгузории терроризм дар шаҳри Деҳлии Нави Ҷумҳурии Ҳиндустон ширкат варзид.

Ба иттилои вазорат, муовини якуми вазири корҳои дохилӣ ба чораҳои андешидаи Ҳукумати Ҷумҳурии Тоҷикистон дар мубориза бо маблағгузории терроризм, тақвияти мудирияти сарҳадоти давлатӣ ва дигар мавзуъҳои мубрам ибрози андеша намуд.

А. Аламшозода, инчунин, дар ҷаласаи пленарии Конфронси мазкур сухан ронда, барои тақвияти ҳамкориҳо ва мубодилаи маълумоту таҷриба дар масоили мубориза бо терроризми байналмилалӣ ва пешгирии маблағгузорӣ ба он даъват ба амал овард.

 

 

Ноҳияи Ашт аз иҷрои нақшаи ҷамъоварии пахта гузориш дод

Заркорони зафарманди ноҳияи Ашт аз иҷрои нақшаи ҷамъоварии пахта баромаданд. «Муждаи зафар»-ро аз номи аҳли заҳмат раиси ноҳия Шуҳрат Муҳаммадзода ба раиси вилояти Суғд Раҷаббой Аҳмадзода расонд, - иттилоъ дод хадамоти матбуоти раиси вилоят.

Дар ноҳия соли равон 6323 гектар пунба кишт шуда, меҳнаткашон бо истифода аз тухмиҳои серҳосили «Мая», «Флеш», «Дӯстӣ» 17311 тонна ҳосил ҷамъ оварданд, ки ба 100,1 фоизи нақша баробар аст.

Ҳоло дар саҳро ҳосил фаровон буда, пахтакорон тасмим гирифтанд, ки бо истифода аз обу ҳавои мусоид ва имкониятҳои мавҷуда, ҳосили боқимондаро чида, дар иҷрои нақшаи солонаи пахтаи вилояти Суғд ҳиссаи арзанда гузоранд.

 

Лашкар ШАРИФЗОДА, "Ҷумҳурият"