Таҳти чунин унвон дар Суди Олии иқтисодии Ҷумҳурии Тоҷикистон бахшида ба Рӯзи Парчами давлатӣ мизи гирд доир гардид. Дар он роҳбарият, судяҳо ва кормандони дастгоҳи судҳои иқтисодӣ иштирок намуданд.

Раиси Суди Олии иқтисодӣ Рустам Мирзозода зикр кард, ки Парчам шиносномаи ҳар давлат аст, ки аз рӯи он кишварро ба расмият мешиносанд. Бо доштани Парчами давлатӣ мебояд ифтихор намуд ва нисбат ба он эҳтиром зоҳир кард.

Ҳамзамон, дигар иштирокчиён баромад намуда, баён доштанд, ки Парчами давлатӣ моҳи ноябри соли 1992 дар Иҷлосияи ХVI Шурои Олӣ, ки дар он роҳи ҳалли мушкилоти кишвар, хатми ҷанги дохилӣ, ҳифзи якпорчагиву Истиқлоли давлатӣ баррасӣ мешуд, дар баробари андешидани тадбирҳои зарурӣ доир ба таъмини сарҷамъӣ ва ҳифзи тамомияти арзии кишвар, рамзҳои давлати соҳибистиқлоламон қабул шуданд. 

Парчами давлатӣ 30 августи соли 2011 дар паҳлуи Қасри миллат бо иштироки Сарвари давлат муҳтарам Эмомалӣ Раҳмон бо сутунпояи баландиаш 165 метр барафрохта шуда, дар Китоби рекордҳои Гиннесс сабт гашт.

Дар таърихи тамаддун ва фарҳанги бою қадимии давлатдории тоҷикон парчам ва парчамдорӣ таърихи ҷолибу тулонӣ дорад. Он дар осори хаттии қадимӣ, асотир, сарчашмаҳои таърихию адабӣ, достон, қиссаву ривоят, эҷодиёти шифоҳии мардум инъикос гардидааст. Парчам ҳамчун рамзи озодихоҳӣ, далериву шуҷоат васф мешавад. Осори мутафаккирон, адибон, олимону муаррихон ба воситаи яке аз шоҳасарҳои адабиёти ҷаҳонӣ - «Шоҳнома» то ба насли имрӯз расидааст. 

Таъкид гардид, ки дар «Шоҳнома» - и безаволи Фирдавсӣ тафсири олии парчаму парчамдорӣ ҳамчун рамзи давлатдорӣ, ифтихори миллӣ ва пирӯзиҳои ворисони Фаридун қаламдод ва баҳо дода мешавад. 

- Парчами давлатии мо нишона аз таърихи чандинҳазорсолаи халқи тоҷик буда, ҳанӯз аз давраҳои пеш ниёгони мо оини парчамсозиву парчамдориро гиромӣ медоштанд. Парчам ҳамчун рамзи ваҳдату ягонагӣ, ҳамдигарфаҳмиву якдилӣ ва ҷоннисориҳои халқ баҳри озодӣ ва Истиқлол шинохта мешавад, - гуфт Рустам Мирзозода. 

 

З. РАҶАБ, “Ҷумҳурият”