Вакилони Маҷлиси намояндагон дар ҷаласаи навбатӣ Созишнома оид ба маблағгузорӣ (Лоиҳаи такмили идоракунии захираҳои об ва обёрӣ дар Тоҷикистон) байни Ҷумҳурии Тоҷикистон ва Ассотсиатсияи байналмилалии рушдро пазируфтанд.

Маҷидӣ Юсуф, муовини вазири молия, зимни баррасии ин масъала иброз дошт, ки созишнома бо тартиби муқарраргардидаи қонунгузорӣ 3 октябри соли ҷорӣ дар ҳаҷми 47 миллион доллари ИМА ба имзо расидааст. Аз маблағи зикршуда, 30 миллион гранти Ассотсиатсияи байналмилалии рушд ва 17 миллион гранти Фонди ягонаи донории трастии Барномаи шарикии Иттиҳоди Аврупо ва Бонки ҷаҳонӣ барои кишварҳои Аврупо ва Осиёи Марказӣ мебошад.

Ҳадаф аз татбиқи лоиҳаро таҳкими иқтидор дар соҳаи банақшагирии захираҳои об, идоракунии обёрӣ дар Тоҷикистон ва баланд бардоштани самаранокии низоми обёрии интихобшуда дар ҳавзаи дарёҳои Вахшу Зарафшон арзёбӣ карданд. 

Тибқи иттилоъ, лоиҳа аз чор қисм – ислоҳоти бахши об ва таҳкими институтсионалӣ (7,5 миллион доллар); такмили низоми обёрӣ (36,7 миллион); идоракунии лоиҳаи (2,8 миллион); қисмати шартӣ оид ба вокуниш ба ҳолатҳои фақулода иборат аст.

Мақоми татбиқкунанда Вазорати энергетика ва захираҳои об, Агентии беҳдошти замин ва обёрии назди Ҳукумати Ҷумҳурии Тоҷикистон муайян шудаанд. 

Татбиқи Лоиҳаи такмили идоракунии захираҳои об ва обёрӣ дар Тоҷикистон соли 2023 оғоз ёфта, анҷоми он соли 2027 дар нақша аст. 

 

М. МИРЗОЁН,  “Ҷумҳурият”