Вазири маориф ва илм Раҳим Саидзода дар вохӯрӣ бо Александр Бурков, губернатори вилояти Омски Федератсияи Россия, ҳамзамон, раиси ҳукумати вилояти Омск, зикр кард, ки ҳоло беш аз 20 ҳазор шаҳрванди Тоҷикистон дар муассисаҳои таҳсилоти миёна ва олии касбии Россия таҳсил намуда, ҳамзамон, дар Тоҷикистон се филиали муассисаҳои таҳсилоти олии касбии Россия ва як Донишгоҳи муштарак фаъолият доранд. 

Мутобиқи иттилои маркази матбуоти вазорат, айни ҳол миёни муассисаҳои таҳсилоти олии Тоҷикистон ва вилояти Омск созишномаҳои ҳамкорӣ ба имзо расида, дар мактабҳои олии вилояти Омск зиёда аз 100 шаҳрванди Тоҷикистон таҳсил мекунанд.

 

 

Мулоқот бо коршиносони СҶТ

Вазири тандурустӣ ва ҳифзи иҷтимоии аҳолӣ Ҷамолиддин Абдуллозода бо гурӯҳи коршиносони байналмилалии Созмони ҷаҳонии тандурустӣ дар ҳайати Сатиш Мишра, Кахал Морган ва Сю Эител мулоқот намуд. 

Гуфта шуд, ки ҳадафи ташрифи ҳайати СҶТ ба Тоҷикистон – таҳияи  тавсияҳо  ва  муайян намудани  самтҳои  стратегӣ  дар доираи лоиҳаи муштарак оид ба таҳкими соҳаи тандурустӣ дар кишвар, таҳлили вазъи соҳаи тавонбахшӣ ва таҳияи лоиҳаҳо дар самти пурзӯргардонии тавонбахшӣ ва воситаҳои ёрирасон, инчунин, расондани мусоидати фаннӣ дар чаҳорчӯбаи Барномаи “Маъюбият ва барқарорсозӣ барои солҳои 2023-2028” мебошад.

 

 

 

Таъсиси Ҷоизаи раиси вилояти Хатлон дар соҳаи фарҳанг

Бо ибтикори раиси вилояти Хатлон Қурбон Ҳакимзода ҷиҳати ҳавасмандгардонӣ ва баланд бардоштани мақоми кормандони соҳаи фарҳанг, рушду такомули санъати касбӣ ва театрӣ дар вилоят Ҷоизаи раиси вилояти Хатлон дар чор номина таъсис дода шуд.

Ҷоизаи раиси вилоят дар риштаи мусиқии суннатии фалак ба номи Одина Ҳошимов, дар бахши санъати эстрадаи миллӣ ба номи Муқаддас Набиева, дар риштаи санъати театр ва ҳаҷв ба номи Аловуддин Абдуллозода ва дар бахши санъати рақси миллӣ ба номи Туйдӣ Бобиева гузошта шудааст. 

Ғолибони ҳар  номина  ҳамасола дар Рӯзи фалак (10 октябр) бо диплом, медал ва 5000 сомонӣ қадр хоҳанд шуд. Барои дарёфти Ҷоиза ҳунармандони аз 18 то 50-солае, ки дар муассисаҳои фарҳангии ҳудуди вилоят на кам аз 5 соли охир фаъолияти эҷодӣ доранд, метавонанд довталаб бошанд.

 

 

 

Оғози татбиқи 113 лоиҳаи сармоягузорӣ дар Хоруғ

Дар доираи Барномаи устуворгардонии шаҳри Хоруғ, бо назардошти рушди инфрасохтор, дар 21 маҳалла ва 113 нуқтаи шаҳр, дар заминаи ҳамкориҳои мутақобилан судманди Мақомоти иҷроияи ҳокимияти давлатии шаҳри Хоруғ бо шарикони рушд татбиқи 113 лоиҳаи нави сармоягузорӣ бо ҷалби 282 ҳазор доллари амрикоӣ сармояи хориҷӣ ва зиёда аз 500 ҳазор доллар саҳми ҷомеа амалӣ мегардад. 

Лоиҳаи мазкур дар доираи мулоқотҳои раиси шаҳр Ризо Назарзода бо сокинон ва таклифу пешниҳоди онҳо ба нақша гирифта шуда, дар ҳамдастӣ бо аҳолӣ ва ҷалби сармояи шарикони рушд барои беҳдошти инфрасохтори аввалиндараҷа амалӣ мешавад. 

Барномаи устуворгардонии шаҳри Хоруғ аз ҷониби Ҳукумати Ҷумҳурии Тоҷикистон маҳз барои беҳтар намудани ифрасохтори шаҳр – яъне таъминоти аҳолӣ бо оби ошомиданӣ ва полизӣ, бунёди иншооти варзишӣ ва бозии кӯдакона, сохтмон ва навсозии каналҳо, кандани чоҳҳои амудӣ, чароғонкунии кӯчаву пасткӯчаҳо ва дигар масъалаҳои ҳаётан муҳим роҳандозӣ мегардад.