Зимни суханронӣ ректори ДМТ, профессор Қобилҷон Хушвахтзода таъкид намуд, ки факултети журналистикаи Донишгоҳи миллӣ зодаи замони Истиқлол буда, 30-сола шуд. Факултет манбаи асосии тайёр кардани кадрҳо барои ВАО-и Тоҷикистони соҳибистиқлол аст. Хушбахтона, ба шарофати меваҳои шаҳдбори истиқлол, дар доираи ҳамкориҳои тарафайн бо Кумитаи телевизион ва радиои назди Ҳукумати Ҷумҳурии Тоҷикистон барои Донишгоҳи миллӣ мавҷи хосса дар диапазони 90.5 FM ҷудо гардида, аввалин барнома дар рӯзи Истиқлол, аллакай пахш гардид. Ифтитоҳи маркази имрӯза низ бо дастгирии Вазорати маориф ва илм, раёсати Донишгоҳ ва хизмати фарзандони устод идомабахши бунёдкориҳои ҷашнӣ мебошад.

Академик Муҳаммадюсуф Имомзода аз хотироти солҳои ҳамкорӣ бо устод ёдовар шуда, иброз намуд, ки ҳангоми фаъолият дар матбуот Асадулло Саъдуллоев роҷеъ ба рӯзгор ва осори адибони машҳур, аз ҷумла Садриддин Айнӣ, Абулқосим Лоҳутӣ, Расул Ғамзатов, Николай Тихонов, Константин Симонов, Ғафур Ғулом, Мирзо Иброҳимов, Аркадий Гайдар, Мӯъмин Қаноат ва дигарон тадқиқот анҷом дода, шахсият ва моҳияти осорашонро барои хонандаи тоҷик аз саҳифаҳои рӯзномаву маҷаллаҳо бозгӯӣ намуда буданд.

Декани факултети журналистика Бахтиёр Қутбиддин зикр намуд, ки профессор Асадулло Саъдуллоев бунёдгузор ва роҳбари мактаби илмии таҳқиқи публитсистикаи муосири тоҷик буда, 15 шогирди унвондор омода кардааст. Аз ин шумора имрӯз 12 нафар дар факултети журналистика ба таълим машғуланд. Домани таҳқиқоти устод басо фаррох буда, ҳамзамон, нақди адабӣ ва публитсистикаро низ фаро мегирад.

Мавриди зикр аст, ки фаъолияти омӯзгории Асадулло Саъдуллоев дар Донишгоҳи миллӣ аз соли 1980 оғоз гардида, то охири умраш идома ёфтааст. Соли 1978 рисолаи номзадиашро дар мавзуи "Замони муосир ва проблемаҳои публитсистикаи советии тоҷик (публитсистикаи Мирзо Турсунзода)" муваффақона ҳимоя мекунад. Соли 1996 дар мавзуи “Ташаккул ва инкишофи жанрҳои насри мустанади тоҷик (солҳои 1960-1980)” рисолаи докторӣ ҳимоя мекунад.

Корманди шоистаи Тоҷикистон, барандаи ҷоизаи Иттифоқи журналистони Тоҷикистон ба номи А. Лоҳутӣ, дорандаи медали "Ветерани меҳнат", "Хизмати шоиста" ва ғайра мебошад. Муаллифи беш аз 50 асар ва 1000 маводи публитсистӣ. Намунаи осораш “Дарё равон аст” (1985), “Публитсистикаи Мирзо Турсунзода” (1988), “Агар сухан коргар шавад” (1992), “Бомдоди шубоб” (1994), “Хосияти адабиёт” (2000). “Жанрҳои журналистикаи радио” (2005), “Асосҳои журналистикаи телевизион” (2008), "Эссе" (2010), “Муаммои назарияи публитсистика” (2015) ва ғайра ба нашр расидааст.

Комрон САФАР, “Ҷумҳурият”