Баҳри дар амал татбиқ намудани сиёсати хирадмандонаи Сарвари давлат бо ташаббуси вазири корҳои дохилӣ Рамазон Раҳимзода барои баланд бардоштани сатҳи донишу маърифатнокии кормандони мақомоти корҳои дохилӣ, воқиф гардидан аз таъриху фарҳанг, адабиёту маданияти ғании миллати тоҷик Озмуни ҷумҳуриявии «Беҳтарин донандаи китоби «Тоҷикон»-и аллома Бобоҷон Ғафуров дар байни ҷузъу томҳои ВКД ташкил ва ҷамъбаст гашт.

Муовини вазири корҳои дохилӣ Нозим Иброҳимзода таъкид кард, ки Озмуни мазкур идомаи мантиқии тадбирҳо дар роҳи ривоҷ додани китобдорию китобхонӣ дар мамлакат мебошад. 

Ҷойи аввалро майори милитсия Хусрав Шарифзода, нозири калони гурӯҳи таҳлилӣ ва корҳои статистикии раёсати ВКД дар минтақаи Рашт, ҷойи дуюмро майори милитсия Шамшод Ҷуразода, муовини сардори ШВКД дар ноҳияи Ашт ва ҷойи сеюмро майори милитсия Бахтиёри Ҷунайд, нозири минтақавии ШВКД дар ноҳияи Шаҳринав, ишғол намуданд. Ба ғолиби ҷойи якум 3000, ҷойи дуюм 2000 ва ҷойи сеюм 1000 сомонӣ супурда шуд.

 

 

 

Ифтитоҳи пули пиёдагард дар Хоруғ

Бо иштироки раиси Вилояти Мухтори Кӯҳистони Бадахшон Мирзонабот Алишер Худобердӣ, вазири нақлиёт Азим Иброҳим, раиси шаҳри Хоруғ Ризо Назарзода ва сокинон пули пиёдагарди бозори марказии шаҳри Хоруғ, ки бар асари сӯхтори моҳи майи ҳамин сол хароб гардида буд, баъди барқарорсозӣ мавриди баҳрабардорӣ қарор гирифт. 

Шуъбаи иттилооти дастгоҳи раиси ВМКБ хабар дод, ки бар асари сӯхтор пули пиёдагард, ки ду соҳили дарёро ба ҳам мепайваст, вайрону валангор шуда, ҳаракати мардум дар он номумкин гардида буд. 

Бо супориши Пешвои миллат муҳтарам Эмомалӣ Раҳмон ва мусоидати Вазорати нақлиёт иншооти мазкур барқарор гашта, рафтуомади сокинон дар ин масир таъмин шуд. Дарозии пул 100 ва паҳноии он 4 метрро ташкил дода, вазни борбардориаш 17 тонна мебошад.

 

Лашкар ШАРИФЗОДА, «Ҷумҳурият»