Мубаллиғи “ДИИШ” 12 сол паси панҷара рафт

Сафар Каримов, сокини ноҳияи Қубодиён, барои таблиғи ғояҳои ифротии ташкилоти экстремистӣ-террористии “ДИИШ” ва ҷалби шаҳрвандон ба сафи ин созмони тундрав 12 сол аз озодӣ маҳрум шуд.

Тибқи иттилои маркази матбуоти Прокуратураи генералӣ, ҳукми зиндон нисбат ба С. Каримовро суди вилояти Хатлон моҳи ноябри соли ҷорӣ содир намуд, ки бар асоси он маҳкумшуда муҳлати адои ҷазоро дар муассисаи ислоҳии низомаш сахт сипарӣ хоҳад кард. 

Сафар Каримов барои он айбдор мешавад, ки замони дар шаҳри Москваи Федератсияи Россия қарор доштанаш ақидаҳои “ДИИШ”-ро ҷонибдорӣ ва шаҳрвандонро барои пайвастан ба он ташвиқ кардааст. Дар робита ба ин далел, нисбат ба ӯ бо моддаи 4011 Кодекси ҷиноятии Ҷумҳурии Тоҷикистон парвандаи ҷиноятӣ оғоз гардида, мавриди ҷустуҷӯи ҷиноятии байналмилалӣ қарор дода шуд. Сипас, дар ҳудуди шаҳри Озинкии вилояти Самараи Федератсияи Россия боздошт ва ахиран ба Тоҷикистон истирдод гардидааст. 

 

 

ҚАЛЛОБӢ

Боздошти марде, ки мошини иҷораро фурӯхту пулашро ба ҷайби худ зад

Кормандони мақомоти корҳои дохилӣ як сокини шаҳри Душанбе (марди 58-сола)-ро ба гумони содир намудани ҷинояти қаллобӣ дастгир намуданд.

Бар пояи маълумоти маркази матбуоти Вазорати корҳои дохилӣ, шахси гумонбар моҳи октябри соли 2020 бо роҳи фиреб ба бовари марди 40-солаи сокини пойтахт даромада, аз ӯ мошини боркаши тамғаи “Шагман”-ро ба муҳлати се сол иҷора гирифтааст. Боздоштшуда мошини иҷораро ба маблағи 40 ҳазор доллари ИМА фурӯхта, пули онро ба манфиати шахсиаш сарф намудааст.

Ҳоло аз рӯи ин ҳодиса тафтишот идома дорад.

 

 

ДУЗДӢ

Ноболиғе бо 30 ҳазор сомонӣ ба дасти милитсия афтод

Маъмурони милитсия дар шаҳри Бохтар ноболиғи 16-солаеро боздошт намуданд, ки ба дуздии 30 ҳазор сомонӣ гумонбар мешавад. 

Сомонаи Вазорати корҳои дохилӣ хабар дод, ки ноболиғи дастгиршуда ин миқдор маблағро аз дукони “Тезтаёр”, воқеъ дар шаҳри Бохтар дуздидааст. Боздошти гумонбар дар асоси муроҷиати марди 28-солаи сокини ҳамин шаҳр ба ШВКД дар шаҳри Бохтар муаяссар шуда, айни ҳол нисбат ба ин ҳодиса тафтишот оғоз шудааст. 

 

Шуъбаи ҳуқуқи рӯзномаи

 «Ҷумҳурият»