Дар доираи Лоиҳаи рушди фарогири деҳот (TRIGGER) Созмони озуқаворӣ ва кишоварзӣ дар ҳамкорӣ бо Вазорати кишоварзии Ҷумҳурии Тоҷикистон, Институти давлатии лоиҳакашии заминсозии «Тоҷикзаминсоз» дар шаҳри Душанбе симпозиуми дурӯзаи илмӣ-амалӣ доир гардид. Дар чорабинӣ шумораи зиёди намояндагони мақомоти маҳаллӣ, кишоварзон, созмонҳои ҷамъиятӣ ва байналмилалӣ, олимон, академикҳо ва коршиносони байналмилалӣ дар соҳаи идоракунии хок иштирок доштанд. 

Ҷаббор Носирзода, муовини вазири кишоварзии Ҷумҳурии Тоҷикистон, зимни иштирок ва суханронӣ дар ин нишаст зикр намуд, ки таназзул ва шӯршавии замин, инчунин, истифодаи бесамари он мушкили умумии тамоми инсоният мебошад.

– Чунонки ҳамаи мо медонем, замин ва тухмии солим асоси истеҳсоли ғизои солим мебошанд. Вале далелу рақамҳо нишон медиҳанд, ки таназзули замин ва хок, аллакай ба зиёда аз 20 дарсади аҳолии ҷаҳон таъсир расондааст. Даромади деҳқонон ва амнияти озуқаворӣ дар зери хатари таъсири таназзули бардавоми захираҳои замин қарор гирифтааст, - гуфт Вулф-Хендрик Горетски, директори Лоиҳаи рушди фарогири деҳот /TRIGGER. 

Лоиҳа ва шарикони он чорабиниҳо оид ба идоракунӣ ва ҳифзи замин, аз ҷумла натиҷаҳои 2 қитъаи намоишӣ оид ба муқоисаи таъсири ғизодиҳии решагӣ бо истифода аз нуриҳои органикӣ, минералӣ, ғизодиҳии баргӣ ба ҳосилнокии картошка ва истифодаи заҳрхимикатҳо, маҳлулҳои аз рустанӣ тайёршуда барои мубориза бар зидди ҳашароти зараррасон дар водии Раштро аз ҷониби ташкилоти ҷамъиятии “Рушди муносибатҳои миёнмарзӣ дар ноҳияи Ҷиргатол” пешниҳод намуданд. Шарики лоиҳа – ташкилоти ҷамъиятии “Барномаи ҷонибдории инкишофи иҷтимои манотиқи кӯҳистон” (БҶИИМК) натиҷаи таҷрибаи муваффақ оид ба баланд бардоштани ҳосилхезии замин тавассути истеҳсол ва истифодаи био-гумус дар водии Зарафшонро пешниҳод намуд.  

– Ҳаёт дар рӯи Замин аз замини солим вобаста аст ва замин зери фишори бисёре аз фаъолияти инсонӣ, аз ҷумла фаъолияти иқтисодӣ низ қарор дорад. Ҳифз накардани хок ба хисороти калони иқтисодӣ хоҳад овард, - изҳор дошт Ҷузеппе Аристеи, роҳбари бахши об дар Намояндагии Иттиҳоди Аврупо дар Ҷумҳурии Тоҷикистон.

Дар рӯзи дуюми симпозиум, Институти давлатии лоиҳакашии заминсозии «Тоҷикзаминсоз» хизматрасониҳои худро оид ба таҳлили ҳамаҷонибаи хок тавассути намоиши амалии таҳлили хок дар озмоишгоҳ пешкаш намуд. Намоиш бо боздид аз саҳро ва омӯзиши амалӣ оид ба гирифтани намунаи хок  аз ҷониби мутахассисони ИДЛЗ «Тоҷикзаминсоз» ба анҷом расид.

Лоиҳаи рушди фарогирии деҳот (TRIGGER), тарҳи муштараки Иттиҳоди Аврупо ва Вазорати федералии ҳамкориҳои иқтисодӣ ва рушди Олмон (BMZ) буда, ба афзоиши арзиши изофаи маҳсулоти кишоварзӣ дар Тоҷикистон тавассути беҳбуди амнияти об ва устуворӣ, баланд бардоштани ҳосилнокии занҷираҳои арзиши интихобшуда, дастгирии рушди бозор, омодагии содирот, пешбурди соҳибкорӣ ва маслиҳатҳои сиёсӣ равона шудааст.

 

Шарофат АШУРОВА,

мутахассиси Лоиҳаи рушди фарогирии деҳот (TRIGGER)