Ҷумҳурии Тоҷикистон дар мубориза бо терроризм ва экстремизм, ки аз хатарноктарин зуҳуроти ҷаҳони муосир шинохта мешавад, мавқеи оштинопазир ва мақоми пешоҳангӣ дорад. Ҷомеаи мо бо ба даст овардани Истиқлоли давлатӣ ба хатар ва таҳдидҳои терроризм ва экстремизм рӯ ба рӯ гардида, оқибатҳои даҳшатбор ва харобиовари онро бо хисороти ҷонӣ ва молӣ дар марҳилаи ҷанги таҳмилии шаҳрвандӣ паси сар намуд. Ин аст, ки Ҳукумати Ҷумҳурии Тоҷикистон доираи хатару таҳдидҳои терроризму ифротгароиро мунтазам пайгирӣ намуда, бо такмили қонунгузорӣ муқовимат ба ин зуҳуротро ҳамеша тақвият мебахшад. 

Бо мақсади амалигардонии қонунгузории мамлакат барномаву стратегияҳои миллӣ бо инъикоси сиёсати мақсаднок ва ҳамоҳангшудаи давлатӣ дар самти муқовимат ба терроризму ифротгароӣ дар амал татбиқ гардида истодаанд, ки марҳилаи дуюми қабул ва амалишавии Стратегияи миллии муқовимат ба экстремизм ва терроризм дар Ҷумҳурии Тоҷикистон барои солҳои 2021-2025 аз ҷумлаи онҳо мебошад.

Президенти Ҷумҳурии Тоҷикистон муҳтарам Эмомалӣ Раҳмон зимни ироаи Паём ба Маҷлиси Олии мамлакат аз 23 декабри соли 2022 дар ротиба ба тақвияти мубориза бо терроризму экстремизм ва ҳанӯз ҳам идома доштани мағзшӯии шаҳрвандон аз сӯи ифротгароён ишора намуда чунин таъкид карданд: “Имрӯзҳо гурӯҳҳои террористиву экстремистӣ барои даъват ва ҷалб намудани шаҳрвандон ба сафҳои худ бо истифода аз технологияҳои муосири иттилоотӣ роҳу усулҳои навро истифода карда, ҷавонони камтаҷрибаву ноогоҳро бо ғояҳои тундгароӣ гумроҳ месозанд. Аз ин лиҳоз, мақомоти дахлдорро зарур аст, ки ҳамоҳангсозии фаъолиятро дар самти ошкор ва пешгирӣ намудани хавфу хатарҳои террористиву экстремистӣ боз ҳам вусъат бахшида, бо роҳи тақвияти корҳои фаҳмондадиҳӣ пеши роҳи гароидани ҷавононро ба равияҳои ифротгаро гирифта, онҳоро дар руҳияи садоқат ба халқу Ватан ва эҳтиром ба арзишҳои инсонӣ тарбия намоянд”.

Қобили зикр аст, ки маҳз дар партави сиёсати инсондӯстонаи Президенти Ҷумҳурии Тоҷикистон ва тадбирҳои мушаххаси Ҳукумати кишвар, зиёда аз 400 нафар шаҳрванди кишвар, асосан, занону кӯдакон, аз кишварҳои ҷангзада ва, ҳамзамон, теъдоди зиёди донишҷӯёни тоҷик, бо мақсади пешгирӣ аз шомилшавӣ ба гурӯҳҳои террористиву ифротгароӣ, аз муассисаҳои таълимии ғайриқонунии динии кишварҳои хориҷӣ ба Ватан баргардонда шуданд. Зимнан, ҷиҳати андешидани чораҳои офиятбахшӣ ва барқарорсозии онҳо тадбирҳои мушаххас андешида, лоиҳаи барномаҳои давлатӣ низ дар ин самт таҳия шуда, дар раванди тасдиқ қарор доранд.

Таҳлилҳо собит менамоянд, ки дар бисёр мавридҳо таҳмили ғояҳои тундгароёна ба афкори занон ба во-ситаи таъсиррасонии ашхоси аз ҳақиқат дур ва дигар аъзои оила сурат гирифта, боиси ҷалби занон ба ин гурӯҳҳо мегардад. Бонувон тавассути мубаллиғони тундрав, шавҳарон, падару бародарон ва технологияҳои иттилоотӣ фирефтаи ақидаҳои бегонапарастӣ мегарданд, ки таъсири бевоситаи он ба раванди муноси-батҳои оилавӣ, тарбияи дурусти фарзандон ва воридшавии фарҳанги бегона ба ҷомеаи мо мебошад.

Аз ин хотир, Пешвои муаззами миллат дар ин самт изҳори нигаронӣ намуда, занонро ба тарбияи дуру-сти фарзандон, нигоҳдошти арзишҳои миллӣ ва риояи танзиму анъанаҳои кишвар даъват карда, хотирни-шон намуданд, ки кумаки модарон дар ин самт ба давлату Ҳукумати мамлакат бениҳоят муҳим ва зарур аст. Аз ин рӯ, дар партави ҳидоятҳои Сарвари давлат занонро мебояд, ки бо ақлу заковати модарона, дуран-дешӣ, масъулияти шаҳрвандӣ ва қарзи инсонии худ дар тарбияи дурусти фарзандон, мутобиқ ба талаботи имрӯза, ҳифзи арзишҳои миллӣ ва ҳалли мушкилоту монеаҳои дар ҷомеа мавҷудбуда, масъулияти ҷиддитар зоҳир намоянд, зеро пешрафти давлат ва тақдири ояндаи сулҳу суботи комили Ватани маҳбубамон маҳз аз сатҳи донишу маърифатнокии фарзандони тарбиятнамудаи зан - модари тоҷик вобастагии калон дорад.

 

Сафаргул БУХОРИЕВА, 

сардори шуъбаи ҳуқуқ ва кор бо кадрҳои Кумитаи кор бо занон 

ва оилаи назди Ҳукумати Ҷумҳурии Тоҷикистон