Президенти Ҷумҳурии Тоҷикистон муҳтарам Эмомалӣ Раҳмон дар Паёми навбатиашон ба Маҷлиси Олӣ (23 декабри соли 2022) бо ифтихор дар бораи ҷавонони кишвар сухан ронда, саҳми онҳоро дар рушди давлат ва ободии Ватан, ҳимояи марзу бум ва содиқ будан ба Тоҷикистони соҳибистиқлол арзанда хонданд. Сарвари давлат доир ба музаффариятҳо ва парчамбардории варзишгарони ҷавон чунин баён доштанд: “Маҳз ҷавононанд, ки дар оммавигардонии варзиш нақши асосӣ дошта, ба шарафи пирӯзиҳои онҳо Парчами Тоҷикистони маҳбуби мо дар гӯшаҳои гуногуни дунё парафшонӣ мекунад”.

 

ТОҶИКИСТОН – ДАВЛАТИ ҶАВОНОН

Дарвоқеъ, ҷавонон неруи тавонои созанда ва пешбарандаи ҳамаи соҳаҳои ҳаёти мамлакат ба ҳисоб мераванд, зеро тибқи маълумоти оморӣ, зиёда аз 70 дарсади аҳолии мамлакат ҷавонони то 35-солаанд. Ин гувоҳи он аст, ки давлати мо давлати ҷавонон мебошад.

Бар пояи таҳлилҳои Хазинаи нуфуси Созмони Милали Муттаҳид, Тоҷикистон аз ҷумлаи кишварҳои дорои афзалияти ҷавонон буда, синну соли миёнаи аҳолӣ 22,5 солро ташкил медиҳад. Ҳамин аст, ки давоми солҳои соҳибистиқлолӣ пешбурди сиёсати давлатии ҷавонон дар меҳвари таваҷҷуҳи роҳбарияти олии Тоҷикистон қарор дорад. 

Яке аз нуктаҳои муҳиме, ки дар ҳамин самт Сарвари давлат дар Паём зикр намуданд: “Бо дастгириву ғамхорӣ фаро гирифтани ҷавонон, ҳаллу фасли мушкилоти ҳаёти онҳо ва истифодаи дурусту оқилона аз ин захираи стратегии миллӣ ба хотири ободиву пешрафти Ватан ва таъмини амнияту суботи ҷомеа аз ҷумлаи масъалаҳои муҳимтарине мебошанд, ки таҳти таваҷҷуҳи хоссаи Ҳукумати мамлакат қарор доранд, зеро Тоҷикистон худ кишвари ҷавонон аст”.

 

ПАРЧАМБАРДОРОНИ ТОҶИКИСТОН

Варзишгарони қавииродаи мамлакат тавонистанд, ки бо ҳунару маҳорати волои худ давоми солҳои соҳибистиқлолӣ номи Тоҷикистонро вирди забонҳо намоянд. Чанде қабл паҳлавони соҳибноми мо Темур Раҳимов, ки дар миёни сангинвазнҳо дзюдочии рақами яки сайёра мебошад, тавонист бори аввал аз мусобиқаи “Ситораҳои ҷаҳонии дзюдо” (“World judo masters”, 22 декабр, Исроил) ба хазинаи варзишии кишвар медал (нишони нуқра) ворид намояд. Темури парчамбардор моҳи ноябри соли 2022 низ ба дастоварди арзанда – ғолиби мусобиқаи “Тоскулоҳи бузург” (“Baky Grand Slam 2022”, 4 – 6 ноябр, Озарбойҷон) ноил гашт, ки то ӯ ягон дзюдочӣ ба ин натиҷа даст наёфта буд.

Дзюдочии дигари ҷавони мо Эмомалӣ Нуралӣ(-66 кг) бо маҳорати баландаш чемпиони ҷаҳон миёни ҷавонон гардид.

Бори аввал дар таърихи варзиши тоҷик 5 ноябри соли 2022 муштзани кишвар Шавкат Раҳимов қаҳрамони ҷаҳон аз рӯи фарзияи IBF (Федератсияи байналмилалии бокс) гардид. Яъне, номи боксчии тоҷик дар қатори номҳои абарварзишгарони риштаи бокс Майк Тайсон, Кличко сабт гашт.

Ду варзишгари дигари мо Миҷгона Самадова ва Шамер Саидов дар Ҷоми ҷаҳон оид ба бокс миёни кишварҳои истеҳсолкунандаи нефт (5-10 декабр Россия) дурахшидан ва барои Тоҷикистон медали тилло оварданд.

Дар маҷмуъ, ба иттилои Кумитаи кор бо ҷавонон ва варзиш, соли 2022 варзишгарони Тоҷикистон аз мусобиқоти байналмилалӣ 538 медал (145 тилло, 157 нуқра ва 236 биринҷӣ) ба даст оварданд. Яъне ба ифтихори варзишгарони мо давоми сол 538 маротиба Парчами давлатӣ парафшон гардида, 145 бор Суруди миллӣ садо додааст.

Ба қавли Пешвои миллат, ки дар оғози Паём иброз доштанд: “Соли 2022 барои Тоҷикистони мо, дар маҷмуъ, соли бобарор буд”.

 

САЗОВОРИ БОВАРӢ БОШЕМ

Ҳар як суханронии Асосгузори сулҳу ваҳдати миллӣ– Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои ман як ангеза аст. Ангеза барои пешрафт ва расидан ба муваффақиятҳои нав, зеро ҳар вақте сухан дар боби ҷавонон равад, Сарвари давлат бо руҳияи баланд ва ҳисси ифтихор аз ин қишр ҳарф мезананд. Ҳатто, соли гузашта ҳангоми мулоқоташон бо ҷавонони кишвар чунин баён доштанд: “Фардои ин Ватани азиз аз ташаббусҳои наҷиб ва анҷоми рисолатҳои бузурги шумо оғоз мешавад”.

Бо дарки ҳамин гуфтаи Президенти маҳбубамон ман, ҳамчун як ҷавони даврони соҳибистиқлол, мекӯшам, то ба боварии Сарвари давлат сазовор бошам ва вазифаи фарзандии хешро дар назди давлату миллат софдилонаю содиқона адо намоям. Аз ин дидгоҳ, аз тамоми ҷавонони худогоҳу худшиноси кишвар даъват ба амал меорам, ки дар иҷрои ин рисолати бузурги таърихӣ бетараф набошанд ва чун пайравони аслии Пешвои миллат дар роҳи расидан ба ормонҳои давлат саҳим бошанд.

 

Маҳмуд МИРЗОЁН,

“Ҷумҳурият”