мулоқотҳо
Фаронса муқобили ҳар гуна амалиёти
муҳосиравии миёни кишварҳост
9 июн Президенти Ҷумҳурии Тоҷикистон Эмомалӣ Раҳмон намояндаи махсуси Президенти Фаронса доир ба кишварҳои Осиёи Марказӣ Эмрӣ де Монтескюро ба ҳузур пазируфт.
Дар мулоқот масоили кунунӣ ва дурнамои ҳамкории Тоҷикистону Фаронса баррасӣ шуданд.
Эмрӣ де Монтескю конфронси байналмилалии обро, ки дар шаҳри Душанбе бо пешниҳоди Тоҷикистон ва таҳти васояти Созмони Милали Муттаҳид оид ба рафти иҷрои Барномаи 10 – солаи амал «Об барои ҳаёт» ҷараён гирифт, бисёр муҳим арзёбӣ намуд. ӯ ҳамчунин таъкид дошт, ки Тоҷикистон бо мавқеъгирии мусоид ва пешниҳодоти дорои аҳамияти ҷаҳонӣ соҳиби обрӯю эътибори баланди байналмилалӣ гаштааст.
Ба гуфти ӯ, Тоҷикистон бо нуфузи байналмилалии худ ба ҳайси як кишвари форсизабон метавонад ҳамчунин дар байни кишварҳои ҳамзабони худ ва дар манотиқи зисти ин мардумон мавқеи хоса дошта бошад.
Дар робита ба ҳолати муҳосираи нақлиётии Тоҷикистон, ки аз ҷониби Ӯзбекистони ҳамсоя ба назар мерасад, Эмрӣ де Монтескю изҳор дошт, ки «Фаронса ва кулли кишварҳои Иттиҳоди Аврупо муқобили ҳар гуна амалиёти муҳосиравии миёни кишварҳоянд ва ҷонибдори ҳалли машваратии моҷарои нақлиётии миёни Тоҷикистону Ӯзбекистон мебошанд».
Дар баробари ин ӯ изҳор дошт, ки Тоҷикистон бояд роҳҳои алтернативӣ низ бунёд намояд, то ки аз вобастагӣ ба роҳи ягонаи аз Иттиҳоди Шӯравӣ боқимонда раҳо ёбад.
Дар мулоқот ҳамчунин оид ба авзои кунунии Афғонистон ва ҳамгироии муштарак бар зидди хатарҳои ҷаҳони муосир гуфтугӯ сурат гирифт.
Баёни ақида (0) Санаи нашр: №: Мутолиа карданд: 1835
