мулоқотҳо
Гуфтугӯи Эмомалӣ Раҳмон бо Роберт Симмонс
31 августи соли 2010 Президенти Ҷумҳурии Тоҷикистон Эмомалӣ Раҳмон намояндаи махсуси Дабири кулли Паймони Атлантикаи Шимолӣ (НАТО) Роберт Симмонсро ба ҳузур пазируфт.
Дар мулоқот масоили кунунӣ ва дурнамои ҳамкории Тоҷикистону НАТО баррасӣ шуданд.
Муҳокимаи вазъи кунунӣ ва дурнамои Афғонистон, ҳамгироӣ дар мубориза бо хатарҳои терроризму экстремизм ва гардиши ғайриқонунии маводи мухаддир ва масоили интиқоли транзитии борҳои ғайринизомии НАТО аз қаламрави Тоҷикистон аз мавзӯъҳои асосии сӯҳбат буд.
Аз ҳамкории дуҷониба дар чаҳорчӯби барномаи «Шарикӣ баҳри сулҳ» ва ба имзо расидани Ёддошти тафоҳуми Хазинаи боварии НАТО бо Тоҷикистон доир ба ҳамкорӣ дар нобудсозии аслиҳаи муқаррарӣ ва поксозии ҳудуди Тоҷикистон аз минаҳо изҳори қаноатмандӣ карда шуд.
Густариши ҳамкорӣ баҳри беҳсозии имконоти Тоҷикистон дар пешгирӣ ва рафъи оқибати ҳолатҳои фавқулодда ва ҳамчунин дастгирии бештари нерӯҳои марзбон ва дигар сохторҳои дахлдори кишвари мо, ки масъулияти ҳифзи сарҳади тӯлонӣ бо Афғонистонро бар ӯҳда доранд, матлуб дониста шуд.
Дар мулоқот ҳамчунин оид ба имконоти мусоидат ба рушди ҳамкории минтақавӣ ва дигар масоили мавриди таваҷҷӯҳ гуфтугӯ сурат гирифт.
-Барои ман шарафи бисёр бузург аст, ки маротибаи чорум бо Ҷаноби Олӣ, Президенти Ҷумҳурии Тоҷикистон Эмомалӣ Раҳмон мулоқот анҷом медиҳам. Дар вохӯрии имрӯза мо асосан масоили вобаста ба мубориза алайҳи терроризм, экстремизм ва гардиши ғайриқонунии маводи мухаддирро мавриди баррасӣ қарор додем. Ёдовар мешавам, ки ҳамкориҳои мутақобилан судманди Тоҷикистон ва Паймони Атлантикаи Шимолӣ ( НАТО ) беш аз пеш густариш меёбанд. Ман ба Ҷаноби Олӣ барои таъмини транзити борҳои ғайринизомии НАТО аз қаламрави Тоҷикистон ва истифодаи фурудгоҳҳои мамлакат миннатдорӣ баён намудам.
Дар ин бора Роберт Симмонс, намояндаи махсуси Дабири кулли Паймони Атлантикаи Шимолӣ, пас аз мулоқот бо Эмомалӣ Раҳмон, Президенти Ҷумҳурии Тоҷикистон, ба намояндагони васоити ахбори омма иттилоъ дод.
-Паймони Атлантикаи Шимолӣ дар Афғонистон то замони ба эътидол омадани вазъият дар ин кишвар ва муқтадир гардидани ниҳодҳои қудратии ҶИА боқӣ хоҳад монд. Аз ин рӯ, мо талош хоҳем кард, ки ҳарчи зудтар дар Афғонистон ҷангу хунрезӣ хотима ёбад ва пеши роҳи хатарҳои ҷаҳони муосир, махсусан терроризму экстремизм ва гардиши ғайриқонунии маводи нашъаовар гирифта шавад,-гуфт Роберт Симмонс, намояндаи махсуси Дабири кулли Паймони Атлантикаи Шимолӣ.
Додоҷон Рӯзиев, «Ҷумҳурият»
Баёни ақида (0) Санаи нашр: №: Мутолиа карданд: 1879
