энергетика
Истеҳсоли қувваи барқ ба 11 миллиарду 136 миллион кВт- соат расид
Абдулло Ёров, директори ШСХК «Барқи тоҷик» зимни нишасти матбуотӣ гуфт, ки дар нӯҳ моҳи соли ҷорӣ истеҳсоли қувваи барқ 11 миллиарду 136 миллион кВт - соатро ташкил дод, ки нисбат ба ҳамин давраи соли гузашта 280,9 миллион кВт - соат зиёд аст.
ШСХК «Барқи тоҷик» оиди беҳтар намудани сатҳи ҷамъоварии маблағҳо чорабиниҳои ташкилӣ, техникӣ ва кадрӣ гузаронд. Аз ҷумла нақшаи чорабиниҳо таҳия гардида, иҷрои он ҳаррӯза таҳти назорати роҳбарият қарор дорад. Дар натиҷаи чунин тадбирҳо фоизи ҷамъоварии маблағи нерӯи барқ дар шабакаҳои барқӣ давра ба давра баланд шуда истодааст ва агар он дар моҳҳои январ - феврали соли ҷорӣ мутаносибан 46 ва 61 фоизро ташкил диҳад, бо андешидани чораҳои зикршуда дар моҳи август ба 92,1 фоиз ва моҳи сентябр ба 101,9 фоиз расид.
-Имрӯз яке аз мушкилиҳои асосии соҳа ин дар сатҳи ниҳоят паст пардохт намудани маблағи барқи истифодашуда аз тарафи корхонаҳои Вазорати мелиоратсия ва захираҳои оби ҷумҳурӣ мебошад,- гуфт А. Ёров.
Зикр гардид, ки то 10 октябри соли равон аҳолӣ пурра бо нерӯи барқ таъмин буд. Ҳоло талабот ба нерӯи барқ зиёд гардида, барои тайёрӣ ба зимистонгузаронӣ корҳои профилактикӣ анҷом ёфтанд. Аз 1 ноябри соли ҷорӣ вобаста ба сардии зимистон маҳдудияти қувваи барқ дар назар аст. Бо дастгирии Бонки рушди исломӣ сохтмони 8 нерӯгоҳи хурди барқӣ идома дорад. Дар ноҳияи Рашт нерӯгоҳи барқии «Шашболоӣ» ба истифода дода шуд. «Барқи тоҷик» барои сохтмони он 16 миллион сомонӣ сарф намуд. Рӯзҳои наздик дар ноҳияи Ҷиргатол нерӯгоҳи хурди барқии «Фатҳобод» низ ба кор шурӯъ мекунад.
Оҳистамоҳи ВАФОБЕК
Баёни ақида (0) Санаи нашр: №: Мутолиа карданд: 4683
