номаҳо
«Рӯзи қабули шаҳрвандон» самаранок истифода гардад
Соли гузашта дар ҳамаи шаҳру навоҳии вилояти Суғд қабули шаҳрвандон бо иштироки раиси вилоят Қоҳир Расулзода ҷараён гирифт. Роҳбари вилоят мардумро ба ҳузур пазируфта арзу шикоят, пешниҳоду дархостҳои онҳоро шунид ва бисёр масъалаҳо ҳаллу фасл шуданд.
Чунин вохӯриву мулоқот бо шаҳрвандон ҳамчунин бо иштироки муовинони раиси вилоят низ баргузор мегарданд, ки, бешубҳа, ба манфиати кор аст. Аммо дар ин самт мехостам, ки нуқтаи назари хешро иброз дошта бошам. Ман бар он андешаам, ки қабули шаҳрвандон танҳо аз баррасии масъалаҳои шахсӣ иборат набошад. Хуб мебуд масъалаҳое чун тақсими қитъаи замин, таъмири боми хона, расонидани кӯмаки моддӣ ва дигарҳоро худи идораҳои дахлдор ҳаллу фасл намоянд. Дар вохӯриҳо бо нафарони аввали сатҳи вилоятӣ бештар масъалаҳои мубрами рӯз, ки ба рушди минбаъдаи минтақаву ҷумҳурӣ нигаронида шудаанд, баррасӣ гарданд.
Масалан, ман ба роҳбари вилоят пешниҳод мекардам, ки телевизиони мо силсиланамоишҳоро оид ба ҳаёт ва фаъолияти фарзандони барӯманди миллат, аз ҷумла Бобоҷон Ғафуров, Мирзо Турсунзода, Нусратулло Махсум, Турсун ӯлҷабоев, Муҳаммад Осимӣ таҳия карда пешкаши бинандагон гардонад. Ҳамчунин аз манфиат холӣ намебуд, агар дар ягон мавзеи хуби маркази вилоят бо таъсиси «Боғи фарҳанг» нимпайкараҳои ситораҳои санъати миллат гузошта шаванд. Дар Ҷамоати деҳоти Ёваи ноҳияи мо, ки зиёда аз 35 ҳазор аҳолӣ дорад, як варзишгоҳи ҷавобгӯй ба талаботи одитарини рӯз мавҷуд нест. Ҷавонони деҳа барои доирсозии ҳар гуна мусобиқот ба деҳоти дигар мераванд. Дар ин ҷо варзишгоҳи хуб бояд сохт. Ва ғайра...
Абдуҷаббор ЮЛДОШЕВ,
ноҳияи Бобоҷон Ғафуров
Баёни ақида (0) Санаи нашр: №: Мутолиа карданд: 3574
