номаҳо
Саттор Расулов - аъзои Ҳукумати Ҷумҳурии Тоҷикистон (то соли 1936) чӣ гуна шахсият буд?
Саҳифаҳои бо мурури замон зардшудаи рӯзномаи ноҳиявии "Болшевики Ховалинг" -ро аз назар гузаронида бо маҷрои ҷараёни зиндагии мардуми гузаштаи диёр ошно гаштам.
Дидам, ки аз сад ҳамагӣ чанд фоизе оиди алангаи оташи таъқибот ва зиндагиномаи мардони боилму фарҳанг навиштаанд, ки бо аксашон ба табъ расидаанд. Дар қатори хабару мақолаҳо дар баъзе аз саҳифаҳои рӯзнома таъзияномаҳо дар бораи шахсони бонуфуз, вале айни замон номашон фаромӯшшуда, ба чашм расиданд.
Аз ҷумла дар шумораи 1 майи соли 1936 чунин таъзия ҷой дорад: "Саттор Расулов. Дар деҳаи Сумбулхо ба дунё омада, баъди вафоти падараш дар тарбияи модараш буд ва ҳамчун аввалин аъзои колхоз фаъолияти ибратбахш дошт. Ин буд, ки ӯро ба колхози Иттифоқ аввалин раис таъин карданд.
Фаъолияти ӯро ба назар гирифта, вайро дар анҷумани Советии Тоҷикистон аъзои Ҳукумати Тоҷикистон гирифтанд…
Саттор Расулов 24 апрели соли 1936 аз беморӣ аз дунё даргузашт".
Аз пайи омӯзиши фаъолияту рӯзгори Саттор Расулов мешавам. Аён мегардад, мардуми деҳае, ки ин марди меҳнатдӯсту номдор дар он ҷо зиндагӣ кардааст, бо барҳамхӯрии ноҳияи Ховалинг (Ховалинг як муддат чун ноҳия барҳам хӯрда буд), ба дигар ҷойҳо муҳоҷир шудаанд. Аз авлоди ин марди номдор кӣ дар қайди ҳаёт аст ва аз худи ӯ чӣ ёдгоре ба замони мо мондааст, бароямон номаълум мебошад.
Маълум аст, ки баъзе аз роҳбарон ва аъзои Ҳукумати Ҷумҳурии Тоҷикистон таҳти таъқибот, дасисабозиҳои душманони дохилӣ ба ҳар тарзу усул дар он солҳои пурфоҷиаву пуршӯр аз ҳаёт маҳрум шуданд. Шояд тақдири ӯ низ чунин ҳал шуда? Саттор Расулов -узви Ҳукумати Ҷумҳурии Тоҷикистон (дар солҳои 30-юми асри гузашта) ҷустуҷӯ, омӯзиш таҳқиқотро тақозо дорад.
Бинобар он, аз ҳамдиёрон, куҳансолон, онҳое, ки Саттор Расуловро медонанд, дар бораи ӯ, фаъолияташ, бозмондагонаш хабаре доранд, хоҳиш менамоем, ки ба мо маълумот пешниҳод намоянд.
Амир Сайиди Мункӣ,
директори Осорхонаи таърихӣ - кишваршиносии
ноҳияи Ховалинг
Баёни ақида (0) Санаи нашр: №: Мутолиа карданд: 3779
