мулоқотҳо
Президенти Тоҷикистон ҳайати Бундестагро ба ҳузур пазируфт
13 июн Эмомалӣ Раҳмон, Президенти Ҷумҳурии Тоҷикистон, ҳайати Бундестаги (Порлумони) Ҷумҳурии Федеративии Олмонро, ки таҳти сарварии Дагмар Энкелманн ба Тоҷикистон ташриф овардаанд, ба ҳузур пазируфт.
Дар мулоқот масоили ҳамкории Тоҷикистону Олмон дар чаҳорчӯби муносиботи дуҷониба ва ҳам Иттиҳоди Аврупо баррасӣ шуданд.
Тавре зикр гардид, ҳадафи асосии ҳайат шиносоӣ бо вазъи кунунӣ ва дурнамои рушди кишварҳои минтақа ва рафти татбиқи амалии Стратегияи Иттиҳоди Аврупо оид ба Осиёи Марказӣ мебошад.
Аз ҷараёни дастрасӣ ба ҳадафҳои ин стратегия дар баъзе соҳаҳои Тоҷикистон, аз ҷумла дар соҳаи маориф қаноатмандӣ изҳор гардид.
Изҳори боварӣ шуд, ки бо мусоидати Иттиҳоди Аврупою ҷомеаи ҷаҳонӣ ва ҷаҳду талоши худи кишварҳои минтақа дар самти бартарафсозии мушкилоти мавҷуда, аз ҷумла рафъи камбизоатӣ, коҳиш додани сатҳи бекорӣ ва ҳаллу фасли проблемаҳои вобаста ба обу энергетика низ натиҷаҳои назаррас ҳосил мешаванд.
Таваҷҷӯҳи зиёд ҳамчунин ба масоили вобаста ба демократикунонии ҷомеа, ҳифзи ҳуқуқу озодиҳои инсон ва таҳкими мубориза бо таҳдиду хатарҳои ҷаҳони муосир зоҳир гардид.
www.president.tj
* * *
Ҳайати Бундестаги Ҷумҳурии Федеративии Олмон таҳти роҳбарии хонум Дагмар Энкелманн ба манзури шиносоӣ аз ҷараёни татбиқи амалии Стратегияи Иттиҳоди Аврупо оид ба Осиёи Марказӣ ва таҳкими ҳамкориҳои Тоҷикистону Олмон вориди кишвари мо шуд. Меҳмонон баъд аз мулоқот бо Эмомалӣ Раҳмон, Президенти Ҷумҳурии Тоҷикистон, бо доираи васеи хабарнигорон низ сӯҳбат карданд.
Дагмар Энкелманн изҳор дошт, ки дар сӯҳбат бо Эмомалӣ Раҳмон масоили вобаста ба равобити дуҷонибаи Тоҷикистону Олмон, тавсеаи демократия дар ҷомеа, озодии воситаҳои ахбори омма, ҳифзи ҳуқуқҳои шаҳрвандон, муқобила бо хатарҳои ҷаҳони муосир, омӯзишу парвариш ва истифодаи захираҳои обу энергетика дар минтақа баррасӣ шуданд. Мавсуф аз татбиқи босамари лоиҳаҳое, ки дар доираи Стратегияи Иттиҳоди Аврупо дар бахши маориф, омӯзиш ва баланд бардоштани сатҳи тахассусии кадрҳои ҷавон амалӣ мегарданд, изҳори қаноатмандӣ намуд.
Намояндагони Бундестаги Олмон дар доираи ин сафар бо роҳбарони дигар ниҳодҳои марбутаи давлатӣ дидору мулоқот анҷом дода, ба кишварҳои минтақа низ сафар мекунанд.
Фирӯзи РАҲМОНИЁН,
"Ҷумҳурият"
Баёни ақида (0) Санаи нашр: №: Мутолиа карданд: 2112
