мулоқотҳо
Аз омодагии хати барқи Сангтӯда-Қундуз-Пули Хумрӣ изҳори хушнудӣ шуд
22 октябри соли 2011 Эмомалӣ Раҳмон, Президенти кишвар, маршал Муҳаммад Қасим Фаҳимхон - муовини аввали раисҷумҳури Ҷумҳурии Исломии Афғонистонро ба ҳузур пазируфт.
Дар мулоқот вазъи кунунӣ ва дурнамои муносибатҳои дуҷониба, дарёфти роҳҳои нав ва шаклу василаҳои самараноки ҳамкории гуногунарсаи мутақобилан судманд баррасӣ ёфтанд.
Таваҷҷуҳи хос ба масъалаҳои татбиқи барномаи ҳамкории энергетикии ду кишвар сурат гирифт. Аз омода шудани хати интиқоли барқи Сангтӯда-Қундуз-Пули Хумрӣ ва имкони оянда афзоиш додани интиқоли барқ аз Тоҷикистон ба Афғонистон изҳори хушнудӣ шуд.
Ба густариши бештари ҳамкории иқтисодӣ ва зербиноии ду мамлакат, татбиқи муваффақона ва босуръати барномаҳои бузурги ҳамкорӣ, аз ҷумла ба бунёди хатҳои дигари интиқоли барқ ва роҳи оҳан изҳори ҳавасмандӣ баён гашт.
Дар робита ба ин Эмомалӣ Раҳмон, Сарвари давлат, бори дигар пуштибонии Тоҷикистон ва омодагии онро ба иштироки фаъол дар татбиқи амалии нақшаи эҳёи Роҳи нави абрешим таъкид намуд.
Рушду тақвияти ҳамгироии миёни сохторҳои қудратӣ ва мақомоти ҳифзи ҳуқуқи ду кишвар, аз ҷумла дар мубориза бо терроризму ифротгароӣ ва истеҳсолу гардиши ғайриқонунии маводи мухаддир зарур шумурда шуд. Омодагии Тоҷикистон барои идомаи омодасозии кадрҳои низомии Афғонистон таъкид гардид.
Густариш ва тақвияти ҳамкории фарҳангӣ, аз ҷумла омодагӣ ба Наврӯзи байналмилалии 2012 дар шаҳри Душанбе низ аз мавзӯъҳои суҳбат буд.
www.president.tj
* * *
Муҳаммад Қасим Фаҳимхон, муовини аввали раисиҷумҳури Афғонистон, дар суҳбат бо хабарнигорон аз натиҷаҳои дидору гуфтугӯяш бо Эмомалӣ Раҳмон, Президенти Ҷумҳурии Тоҷикистон тавсиф кард. Ӯ изҳор дошт, ки дар пайи ин мулоқот барои тавсеаи ҳамкориҳои бисёрҷонибаи ду кишвар бахусус, дар бахшҳои энергетика, илму фарҳанг ва амниятӣ мувофиқа ҳосил шудааст.
Дар ин дидор нақши Тоҷикистон дар таъмини сулҳу субот ва бозсозии Афғонистон муҳим арзёбӣ гардида, тақвияти робитаҳои мустақими ниҳодҳои қудратӣ, мақомоти ҳифзи ҳуқуқи ду кишвар дар роҳи мубориза бо терроризму ифротгароӣ, ҷиноятҳои фаромиллӣ ва расидагии сареъ ба гардиши ғайриқонунии маводи мухаддир зарур шумурда шудааст.
Муҳаммад Қасим Фаҳимхон ва ҳайати ҳамроҳонаш бо шумули Муҳаммад Исмоилхон, вазири энергетика ва захоири оби ин кишвар, аз омода шудани хатти интиқоли барқи Сангтӯда-Қундуз-Пули Хумрӣ истиқбол намуда, аз имкони дар оянда афзоиш ёфтани интиқоли нерӯи барқи Тоҷикистон ба Афғонистон хушбинӣ карданд. Бояд гуфт, ки тавассути ин хат аз нерӯгоҳи «Сангтӯда-1» ба Афғонистон нерӯи барқ интиқол мешавад. Бар пояи қарордод миёни ду кишвар дар ҳоли ҳозир ба далели камбуди нерӯи барқ дар Тоҷикистон танҳо дар 5 моҳи баҳору тобистон интиқоли барқ ба Афғонистон сурат мегирад.
Ба қавли ҳайати расмии Афғонистон, Тоҷикистон ба унвони кишвари дӯсту ҳамзабон ва ҳамфарҳанг дар беҳбуд бахшидани вазъи иҷтимоии Афғонистон нақши амалӣ гузошта, дар мушкилтарин давраҳо аз манофеи ин кишвар қотеъона ҳимоят кардааст.
Фирӯзи РАҲМОНИЁН,
«Ҷумҳурият»
Баёни ақида (0) Санаи нашр: 1.11.11 №: 151-152 Мутолиа карданд: 2090
