номаҳо
Саиди Бараҳнаро аз ёд набаред!
Исфара таърихи қадиму рангин дорад, аммо он ҳанӯз пура таҳқиқ нашудааст. Аз як қисми бозёфтҳо ва ёдгориҳои таърихӣ агар ном баранд, қисми дигарро умуман фаромӯш кардаанд, ҳарчанд ки онҳо дастрасу чашмрасанд. Дар натиҷа онҳо харобу нобуд мешаванду аз ёдҳо мераванд. Яке аз ин гуна ёдгориҳои таърихӣ мақбараи Саиди Бараҳна мебошад. Он дар маркази шаҳр, дар ҳудуди қабристони ҳамном ҷойгир аст. Таърихи беш аз панҷсадсола дорад.
Доир ба ин мақбара боре ҳам мутахассисон пажӯҳиш набурдаанд. Оиди шахсияти Саиди Бараҳна низ маълумоти дақиқе дастраси мардум нест. Танҳо муаррих Н. Турсунов бо ду ҷумла зикр мекунад, ки Шайх-ул-Исмоили Балхӣ, маъруф ба Саиди Бараҳна соли 1476 дунёро падруд гуфтааст ва мазори ӯ дар қисмати ҷанубӣ воқеъ аст.
Ҳамин маълумот кофист, ки ҳама шубҳаҳои вобаста ба ёдгории меъмориву таърихӣ будани мақбараи Саиди Бараҳна барҳам зананд ва моро ба ҳифзи ин макон вазифадор созанд.
Саиди Бараҳна дар миёни мардум чун шоир, мутафаккир, донандаи хуби Қуръон ва Ҳадис, илми дин ва авлиёи давр, обрӯву эътибори зиёд дорад. Ба хотири гиромидошти ин шахсият болои қабри ӯ мақбара сохтанд. Пас аз даргузашти фарзанди ӯ низ мардум дар паҳлуи мақбараи Саиди Бараҳна мақбараи дигар бунёд намуд.
Ба зиёрати падару фарзанд аз дохили кишвар ва берун аз он, аз ҷумла Ӯзбекистону Қирғизистон, ихлосмандон меомаданд.
Хулоса, мақбараи Саиди Бараҳна ниёз ба тармиму таъмир дорад. Нахуст Вазорати фарҳанги ҷумҳурӣ бояд онро дар рӯйхати ёдгориҳои таърихии ҳифзшаванда ворид созад. Албатта, пас аз он бовар дорем, ки мақбараи Саиди Бараҳна мавриди таҳқиқ қарор мегирад.
Раҳматбой ҚОДИРОВ,
шаҳри Исфара
Баёни ақида (0) Санаи нашр: 1.11.11 №: 151-152 Мутолиа карданд: 4586
