мулоқотҳо
Эстония аз Тоҷикистон пуштибонӣ мекунад
12 январи соли 2012 Эмомалӣ Раҳмон, Президенти мамлакат, Урмас Паэт - вазири корҳои хориҷии Эстонияро, ки бо сафари расмӣ дар шаҳри Душанбе қарор дорад, қабул кард.
Дар мулоқот масоили вобаста ба муносиботи сиёсӣ, иқтисодию тиҷоратӣ ва илмию фарҳангии ду кишвар баррасӣ шуданд.
Таваҷҷуҳи зиёд ба густариши робитаҳои барои ҳар ду ҷониб судбахш ва таҳкими заминаи қарордодию ҳуқуқии ҳамкорӣ зоҳир гашт.
"Тоҷикистон рушди пайвастаи равобит бо мамолики аврупоии назди Балтика, аз ҷумла Эстонияро муҳим мешуморад", - изҳор дошт Эмомалӣ Раҳмон, Президенти Тоҷикистон.
Таъкид гардид, ки мавқеи ҳамсон ва ё наздики Тоҷикистону Эстония оид ба бисёр масоили умдаи сиёсати байналмилалӣ заминаи хуби ҳамгироии ду кишвар дар арсаи ҷаҳонӣ аст.
Ҳар ду ҷониб ба густариши ҳамкории иқтисодӣ-тиҷоратӣ ва сармоягузорӣ, аз ҷумла бо назардошти бозори Афғонистон ва кишварҳои Осиёи Ҷанубӣ, изҳори ҳавасмандӣ намуданд.
Урмас Паэт изҳор дошт, ки Эстония аз воридшавии Тоҷикистон ба Созмони ҷаҳонии савдо пуштибонӣ мекунад.
Гуфтугӯи судманд доир ба омодагӣ ба Конфронси навбатии РЕККА - Форуми ҳамкории минтақавии иқтисодӣ оид ба Афғонистон, ки моҳи марти соли равон дар шаҳри Душанбе баргузор мегардад, сурат гирифт.
Ҳамчунин доир ба роҳҳои ҳалли қазияи бисёрсолаи Афғонистон ва ба сулҳу созиш ва корҳои созандагӣ раҳнамун намудани неруҳои манфиатдори ин кишвар табодули назар шуд.
Баёни ақида (0) Санаи нашр: 14.01.12 №: 9 Мутолиа карданд: 2035
