мулоқотҳо
Президент машварати идона доир намуд
22 феврали соли 2012 Эмомалӣ Раҳмон, Президенти кишвар, бо роҳбарияти сохторҳои қудратӣ ва мақомоти ҳифзи ҳуқуқ ба истиқболи солгарди 19 - уми таъсиси Қувваҳои Мусаллаҳи Тоҷикистон машварати идона доир намуд.
Эмомалӣ Раҳмон, Сарвари давлат, Сарфармондеҳи олии Қувваҳои Мусаллаҳи Тоҷикистон роҳбарони вазорату идораҳои қудратӣ ва мақомоти ҳифзи ҳуқуқу тартибот ва дар симои онҳо тамоми ҳайати шахсии Артиши миллӣ ва кулли воҳидҳои низомиро бо солгарди 19 -уми таъсиси неруҳои дифоии кишвар табрику таҳният гуфта, ба онҳо барои ҳифзи амну суботи Ватани азиз ва ҳаёти осоиштаи мардуми заҳматкаш матонату далерӣ, бурдборӣ, барору комёбӣ, сиҳатии комил ва хушбахтӣ таманно намуд.
Эмомалӣ Раҳмон, Президенти кишвар, бо ёдоварӣ аз таърихи начандон тулонӣ, вале пур аз шебу фарозҳои Қувваҳои Мусаллаҳи Тоҷикистон таъкид дошт: "Мо артиш надоштем, ҳатто афсару генерали низомӣ надоштем. Ин воқеияти пурдаҳшати он солҳо буд ва ҳар як афсару сарбоз бояд хуб донанд, ки мо дар шароити вазнини зери хаймаҳои саҳроӣ дар фурудгоҳи Айнӣ Артиши миллӣ таъсис додем".
Ҳамчунин таъкид гардид, ки ҳоло таъминоти моддию техникии Қувваҳои Мусаллаҳи кишвар, яъне маоши афсарону сарбозон ва кормандони дигар мақомоти қудратию ҳифзи ҳуқуқу тартибот, таъминот бо либосворию хурока, техникаю таҷҳизоти муосири хизмати ҳарбӣ ва ғайра нисбат ба солҳои пешин даҳҳо баробар афзудааст ва ин ҳар як муҳофизи марзу буми Ватан ва оромию суботи кишварро ба хизмати софдилонаю садоқатмандона водор месозад.
Эмомалӣ Раҳмон, Президенти кишвар, Сарфармондеҳи Олии Қувваҳои мусаллаҳи Тоҷикистон, дар фароварди машварат онҳоро бори дигар бо ин санаи фархунда шодбош гуфта, таъкид дошт, ки ба боварию эътимоди мардуми шарафманди Тоҷикистон чун муҳофизони шуҷои Ватан ва рӯзгори осудаи сокинони он сазовор бошанд.
Баёни ақида (0) Санаи нашр: 23.02.12 №: 24 Мутолиа карданд: 2025
