мулоқотҳо
Изҳори қаноатмандӣ аз рушди Тоҷикистон
29 феврал, Эмомалӣ Раҳмон, Сарвари давлат, Тодд Шнайдер - роҳбари гурӯҳи Хазинаи байналмилалии асъорро ба ҳузур пазируфт. Дар мулоқот ҳолати кунунии ҳамкорӣ ва роҳҳои дастгирии минбаъдаи рушди иҷтимоию иқтисодии Тоҷикистон баррасӣ ёфт.
Аз натиҷаҳо ва дурнамои рушди иҷтимоию иқтисодии Тоҷикистон, ки сарфи назар аз таъсири омилҳои манфии беруна ба назар мерасанд, изҳори қаноатмандӣ шуд.
Таваҷҷуҳи зиёд ба таҳияи Кодекси нави андози Тоҷикистон, ки аз шартҳои муҳими беҳсозии фазои сармоягузорӣ ва соҳибкорӣ ба шумор меравад, зоҳир гардид.
Тавре Эмомалӣ Раҳмон, Президенти кишвар, изҳор дошт, "ҳадаф кам кардани шумораи андозҳо ва ҳаҷми онҳо мебошад, то ки андозсупорандагон даромадҳои воқеии худро рӯпӯш накарда, ба таври шаффоф амал намоянд". Изҳори боварӣ шуд, ки чунин тарзи кор ҳам ба манфиати андозсупорандагон ва ҳам буҷети давлат буда, ҳолатҳои ба коррупсия мусоидаткунандаро аз миён мебардорад.
Хотиррасон бояд намуд, ки лоиҳаи Кодекси нави андози Тоҷикистон аз ҷониби комиссияи ҳукуматӣ дар ҳамкорӣ бо коршиносони муассисаҳои байналмилалии молиявӣ таҳия мегардад.
Гуфтугӯи судманд ҳамчунин доир ба барномаи ояндаи ҳамкории Тоҷикистону Хазинаи байналмилалии асъор, ки дар ҳоли баррасӣ аст, сурат гирифт.
Баёни ақида (0) Санаи нашр: 3.03.12 №: 29 Мутолиа карданд: 2034
