мулоқотҳо
Вохӯрии Президент бо вазири рушди иқтисоди Ҷумҳурии Озарбойҷон
Нимаи дуюми рӯзи 5 март Эмомалӣ Раҳмон, Президенти кишвар, Шоҳин Мустафоев, вазири рушди иқтисоди Ҷумҳурии Озарбойҷонро ба ҳузур пазируфт.
Дар мулоқот масоили вобаста ба муносиботи дӯстӣ ва ҳамкории барои ҳар ду ҷониб судманди Тоҷикистону Озарбойҷон баррасӣ шуданд.
Бо қаноатмандӣ аз баргузории нахустин ҷаласаи Комиссияи байниҳукуматии ҳамкории иқтисодию тиҷоратии Тоҷикистону Озарбойҷон таъкид гардид, ки имкону захираҳои фаровони ду мамлакат барои густариши робитаҳои судбахш бояд мавриди баҳрабардорӣ қарор бигирад.
Ҳавасмандии ҳар ду ҷониб ба рушди ҳамгироии сиёсӣ ва ҳамкорӣ дар соҳаҳои иқтисод ва тиҷорат, сармоягузорӣ, саноат, энергетика, нақлиёт, кишоварзӣ, маориф, фарҳанг, туризм ва ғайра таъкид гардид.
Таваҷҷуҳи зиёд ба густариши робитаҳои нақлиётӣ барои афзун намудани ҳаҷми боркашониҳо ва боло бурдани иқтидори транзитии ду кишвар зоҳир карда шуд.
Гуфтугӯи судманд, ҳамчунин доир ба масоили минтақавию ҷаҳонӣ сурат гирифт.
www.president.tj
* * *
Дар нахустин ҷаласаи Комиссияи байниҳукуматии ҳамкории иқтисодию тиҷоратии Тоҷикистону Озарбойҷон вазъи феълии ҳамкориҳои дуҷониба баррасӣ гардида, дар иртибот ба имкону захираҳои мавҷуда густариши робитаҳои судбахши ду кишвар таъкид шудааст.
Ин матлабро Шоҳин Мустафоев, вазири рушди иқтисоди Ҷумҳурии Озарбойҷон, баъд аз дидору гуфтугӯ бо Эмомалӣ Раҳмон, Президенти Ҷумҳурии Тоҷикистон, дар ҳузури хабарнигорон баён намуд. Бино ба гуфти ӯ, ҳамкориҳои ду кишвари ба ҳам дӯст дар бахшҳои иқтисодӣ ва фарҳангию иҷтимоӣ таърихи дерина дорад. Дар ҳамин росто ҷиҳати ба роҳ мондани самтҳои нави ҳамкорӣ, иртиботи бештари соҳибкорони ду кишвар ва баргузории ҳамоишу конфронсҳо оид ба масъалаҳои тиҷоратӣ мувофиқа ҳосил шудааст. Ба бовари Шоҳин Мустафоев, ин омил ба тавсеаи бештари равобити иқтисодиву тиҷоратии ҳарду ҷониб мусоидат хоҳад кард.
Вазири рушди иқтисоди Ҷумҳурии Озарбойҷон зикр кард, ки дар робита ба гузориши ҳайати мо аз нахустин ҷаласаи Комиссияи байниҳукуматӣ Ҷаноби Президент барои тақвияти бештари ҳамкориҳо дастуру тавсияҳои судманд доданд.
Бино ба иттилои Шоҳин Мустафоев, баргузории ҷаласаи Комиссияи байниҳукуматии ҳамкории иқтисодию тиҷоратии Тоҷикистону Озарбойҷон ин навбат дар шаҳри Боку дар назар аст.
Фирӯзи РАҲМОНИЁН,
"Ҷумҳурият"
Баёни ақида (0) Санаи нашр: 8.03.12 №: 31 Мутолиа карданд: 2070
