мулоқотҳо
27 март суҳбати пурмуҳтаво бо Ламберто Занниер, Дабири кулли Созмони амният ва ҳамкорӣ дар Аврупо, баргузор гардид...
Ламберто Занниер барои муҳайё намудани шароити хуби кории конфронси 5-уми RЕCCА, ки барои тамоми минтақа аҳамияти бузург дорад, ба Эмомалӣ Раҳмон ва Ҳукумати Тоҷикистон изҳори сипос кард.
Аз ҷараёни кунунӣ ва дурнамои ҳамгироии Тоҷикистон ва Созмони амният ва ҳамкорӣ дар Аврупо дар ҳама се самти авлавиятноки фаъолияти ин созмон - сиёсию амниятӣ, иқтисодию экологӣ ва гуманитарӣ арзи қаноат карда шуд.
Бо изҳори хушнудӣ аз фаъолияти Коллеҷи сарҳадбонии САҲА дар Тоҷикистон, дастгирии фаъолияти нерӯҳои сарҳадӣ ва дигар сохторҳои марбута, ҳамзамон ифтитоҳи як маркази минтақавии омӯзишӣ дар Тоҷикистон, аз ҷумла барои шаҳрвандони Афғонистон, зарур шумурда шуд.
Ламберто Занниер ба нақши Тоҷикистон дар барқарорсозии иқтисодиёт ва амну суботи Афғонистон баҳои баланд дода, таъкид дошт, ки лоиҳаҳои сершумори зербиноии дар конфронси мазкур матраҳшуда бояд аз ҷониби ҷомеаи ҷаҳонӣ мавриди пуштибонӣ ва сармоягузорӣ қарор дода шаванд.
Гуфтугӯи созанда ҳамчунин доир ба рушди институтҳои ҷомеаи шаҳрвандӣ дар Тоҷикистон ва равандҳои демократӣ сурат гирифт.
Баёни ақида (0) Санаи нашр: 29.03.12 №: 39 Мутолиа карданд: 2005
