номаҳо
Агар вазорат китобхонаамро ба қайд мегирифт…
Беш аз ду ҳазор китоби бадеию таълимӣ дорам. Онҳоро бо маоши омӯзгориям дар солҳои гуногун харидаам. Шодам, ки ҳамдеҳагонам аз китобҳоям истифода мебаранд. Охир дар деҳа дигар китобхона вуҷуд надорад. Ба хулосае омадам, ки хонаеро барои адабиёт ҷудо намоям. Тахта харидаму усторо киро кардам, то барои китобҳо раф бисозад.
Хидматрасонӣ ба адабиётдӯстон пас аз ин осонтар шуд. Хонандагон мепурсанд, ки кадом китобҳои нав дорам? Ман ба ин савол, мутаассифона, ҷавоби мусбат дода наметавонам. Аз маошам миқдори маблағе барои харидани онҳо ҷудо мекунам, аммо ин кофӣ нест. Ва ҳам маъюби гурӯҳи дуюмаму қудрати ба маркази шаҳру ноҳия рафта харида овардани китобҳоро надорам.
Агар Вазорати фарҳанги ҷумҳурӣ ин китобхонаи хурдакаки маро расман ба қайд мегирифту бо китобҳои нав онро таъмин менамуд, сарам ба осмон мерасид.
Неъматулло АЙНИДДИНОВ, деҳаи Кафтархонаи ноҳияи Восеъ
Баёни ақида (0) Санаи нашр: №: Мутолиа карданд: 4692
