илм
Эдгард Биммер ба зарраҷарроҳии тоҷик баҳои баланд дод
Дар Донишгоҳи давлатии тиббии Тоҷикистон ба номи Абӯалӣ ибни Сино ба ифтихори 90-умин солгарди зодрӯзи олими намоёни тибби муосир, доктори илмҳои тиб, профессор Саттор Раҳимов, конфронси илмию амалии олими ҷавон ва донишҷӯён дар мавзӯи "Тибби муосир дар Тоҷикистон: мушкилот, дастовард ва дурнамои рушди он" баргузор гардид.
Ин табиби тоҷик беш аз 25 соли ҳаёти худро ба рушди инкишофи илми ҷарроҳии муосири тоҷик ва тайёр намудани кадрҳои баландихтисоси соҳа сарф намудааст.
- Боиси сарфарозист, ки пажӯҳишҳои тиббии оғознамудаи Саттор Раҳимовро имрӯз даҳҳо шогирдони болаёқат ва олимони ҷавону донишҷӯёни соҳибистеъдод бомуваффақият идома медиҳанд. Масъалаҳои мубрами тибби муосир диққати олимону донишҷӯёни донишгоҳи моро беш аз пеш ба худ ҷалб менамоянд, - зикр намуд дар сухани ифтитоҳӣ Убайдулло Қурбонов, ректори донишгоҳ.
Соҳиб Раҳмонов, муовини вазири тандурустии ҷумҳурӣ, дастовардҳои тиббии олимону донишҷӯёнро дар замони истиқлолият дар ҷумҳурӣ назаррас арзёбӣ кард. Назар ба гуфтаи мавсуф дар қаламрави ҷумҳурӣ бемориҳои сироятӣ назар ба соли 1994 панҷ маротиба коҳиш ёфтааст. Имрӯз дар Тоҷикистон ҷарроҳиҳои мураккаби дилу рагҳо ва иваз намудани узвҳои инсон бо истифода аз таҷҳизоти муосири тиббӣ васеъ ба роҳ монда шудааст. Агар шаҳрвандони Тоҷикистон қаблан барои муолиҷа ба хориҷи кишвар мерафтанд, имрӯз хориҷиён ба мамлакати мо меоянд.
Эдгард Биммер, профессори Донишгоҳи шаҳри Мюнхени Олмон, яке аз аввалин зарраҷарроҳи сатҳи ҷаҳонист, ки Убайдулло Қурбонов рисолаи докториро таҳти роҳбарии ӯ ҳимоя намудааст, ба рушди тибби муосир дар Тоҷикистон, хоса ба зарраҷароҳии тоҷик, баҳои баланд дод.
Дар конфронс 149 маърӯза оид ба бемориҳои дарунӣ, қалб, масоили ҷарроҳии умумӣ, бемориҳои атфол, дандонпизишкӣ, тибби назариявӣ мавриди баррасӣ қарор гирифт.
Дар кори он олимони ҷавон ва донишҷӯён аз Федератсияи Русия, ҷумҳуриҳои Қирғизистон ва Қазоқистон низ ширкат намуданд.
М. САФАР,
"Ҷумҳурият"
Баёни ақида (0) Санаи нашр: 26.05.12 №: 67 Мутолиа карданд: 4997
